AMISOM oo lagu wareejiyay Hub ay lahaayeen oo laga soo bad baadiyay Al Shabaab (Daawo Sawirro)

Maamulka Hirshabelle ayaa maanta ku wareejiyay saraakiil katirsan ciidamada AMISOM hub ay lahaayeen Ciidankooda oo laga soo bad baadiyay dagaalyahano katirsan Al Shabaab oo jimcaha weerar ku qaaday kolonyo AMISOM ah oo marayay Duleedka Balcad.

Munaasabad kooban oo maanta ka dhacday Madaxtooyada Hirshabelle ayaa saraakiil katirsan AMISOM lagula wareejiyay hub ciidamada dowlada kasoo bad baadiyeen dagaalyahandii Al Shabaab ee weeraray ciidamada AMISOM.

Madaxweynaha maamulka Hirshabelle Maxamed Cabdi Waare oo munaasabada ka hadlay ayaa sheegay in ciidamada dowlada Soomaaliya kasoo bad baadiyeen Al Shabaab hub ay lahaayeen kadib weerar ay ku qaadeen.

Waxa uu sheegay Madaxweyne Waare in ciidamada Soomaaliya ay muujiyeen geesanimo ayna Al Shabaab kasoo furteen hub ay lahaayeen Ciidamada AMISOM, waxa uuna u mahad celiyay ciidamada dowlada ee howlgalkaasi ka qeyb qaatay.

Saraakiil katirsan Ciidamada AMISOM oo ku sugnaa Madaxtooyada Hirshabelle ayaa lagu wareejiyay labo qori oo noocoodu yahay Dhashiike oo laga soo furay gaadiid tikniko ah oo Ciidamada AMISOM looga gubay duleedka Balcad.