Dagaalo ayaa la soo sheegayaa iney weli ka socdaan gudaha degmada Balcad ee gobolka Sh/dhexe oo xoogag taabacsan Al-Shabaab maanta barqadii weerar lama filaan ah ku soo qaadeen.
Al-Shabaab oo dhowr jiho ka soo galay degmada Balcad ayey wararku sheegayaan iney qabsadeen xarunta Maamulka degmada, iyagoo maxaabiisna ka sii daayey saldhiga Booliska.
Warar kale ayaa sheegayaa in Al-shabaab ay furteen Idaacad FM gaar loo leeyahay oo ka howlgeleysay degmadaas.
Dad badan ayaa la soo sheegayaa iney ka firxadeen degmada Balcad, iyagoo u baxsaday deegaano ku dhow, halka dadka intiisa badan ay ku jiraan guryahooda iyagoo cabsi fara badan muujinaya.
Weerarka lagu soo galay degmada Balcad ka hor ayaa waxaa la soo sheegayaa in Dagaalyahano ka tiran Alshabaab ay jidka u galeen kolonyo gaadiid ah oo marayay duleedka degmada Balcad iyagoo gubay qaar ka mid ah gaadiidka ciidamada AMISOM.
Warar aan la xaqiijin ayaa sidoo kale sheegaya in Al-shabaab ay qabsadeen gaadiid kuwa xamuulka qaada ah oo saanad u sidey saldhig ay ciidamada AMISOM ku leeyihiin magaalada Jowhar.
Ciidamo boqolaal gaaraya oo gurmad ah kuna hubeysan gaadiidka dagaalka ayaa ka soo kala dhaqaaqay magaalooyinka Jowhar iyo Muqdisho kuwaasoo isugu jira milateriga Somalia iyo AMISOM si ay gacan u siiyaan saaxiibadood, iyadoo wararkii ugu dambeeyey ee naga soo gaaraya Balcad ay sheegayaan in dagaalku uu sii xogeystay khasaare badana uu jiro.
Xafiiska Shabakada Allbanaadir.com
Muqdisho Somalia
Allbanaadir@live.com
