Taliyaha hoggaanka Canshuuraha ee Ciidanka Booliska Soomaaliyeed Jen Cabdullaahi Xasan Bariise oo Warbaahinta kula hadlayay Muqdisho ayaa sheegay in laamaha Amniga ay qabteen laba ruux iyo Gaari ay wateen, kuwaasoo lagu tuhunsan yahay iney ka qeyb qaateen dilka Alle ha u naxariistee Xildhibaan Cismaan Cilmi Boqore.
Waxa uu sheegay taliyaha in kiiska dilka ah ee loo geystay Xildhibaanka aan intaasi looga hari doonin, isla markaana ragga la hayo baaritaano lagu sameyn doono, sidoo kale kuwo kale oo uu sheegay inay maqan yihiin ay ku raad joogaan.
Cadaaladda ayuu sheegay in dhawaan la horkeeni doono dadkii ka dambeeyay dilka Xildhibaan Cismaan Cilmi Boqore oo lagu toogtay agagaarka hoygiisa oo ku yaalla degmada Kaaraan ee Gobolkan Banaadir.
Alle ha u naxariistee Xildhibaan Cismaan Cilmi Boqore ayaa ka mid ahaa xildhibaanada ugu da’da weyn ee Baarlamaanka Soomaaliya, waxaana uu mar ka mid noqday guddoomiye ku xigeenada Golaha Shacabka.
Xafiiska Shabakada Allbanaadir.com
Muqdisho Somalia
Allbanaadir@live.com
