Madaxweynaha Koofur Galbeed C/Casiis Xasan Maxamed (Lafta Gareen) oo maalmahan ku sugnaa magaalada Muqdisho ayaa maanta la kulmay Shiikh Mukhtaar Roobow Abuu Mansuur oo sanadkii hore dabaqaayadiisii laga soo xiray Magaalada Baydhabo ee gobolka Bay.
Guri uu xabsi ku yahay Mukhtaar Roobow oo ay gacanta ku heyso Hey’adda NISA kuna dhow xarunta Dhexe ee heyaddaas ayaa la sheegay inuu kulankanku ka dhacay.
Mukhtaar Roobow ayaa markii hore ku gacan seyray inuu la kulmo Laftagareen balse markii dambe waxaa la sheegay inuu aqbalay.
Labada nin ayaa ka wadahadlay shaqaaqooyinkii ka dhacay Baydhabo sidii loo xalin lahaa iyo qaabkii lagu sii deyn lahaa isaga, iyadoo wararku sheegayaan in Madaxweynaha Koonfur Galbeed C/casiis Laftagareen uu Mukhtaar Roobow ka raalli geliyay qaabkii loola dhaqmay iyo dhibaatooyinkii ka dhashay markii la soo xiray.
Laftagareen ayaa u sheegay Roobow inuu diyaar u yahay in wax kasta oo tabasho ah in miiska wadahadalka lagu dhameeyo.
Inkastoo aan la ogeyn jawaabta uu arrimahan ka bixiyey Mukhtaar Roobow ayey haddana wararku sheegayaan in kulankan aysan natiijo fiican ka soo bixin hase ahaatee waxaa lagu balamay kulamo kale iney yeeshaan sida ay inoo xaqiijiyeen ilo wareedyo ku dhow kulankaas.
Xafiiska Shabakada Allbanaadir.com
Muqdisho Somalia
Allbanaadir@live.com
