Agaasimaha guud ee heyadda socdaalka iyo jinsiyadaha Somalia iyo saraakiil ka kala socotay xafiisyada hay’adda ayaa gaaray Magaalada Nairobi ee dalka Kenya.
Agaasimaha iyo wafdigiisa ayaa kormeer shaqo ku tagay xafiiska Bixinta Baasaboorada iyo arimaha Socdaalka ee Safaarada Soomaaliya ku leedahey Kenya oo ay dhawaan agaasimaha guud ka soo gaartay cabashooyin ka imanaya muwaadiniinta Soomaaliyeed ee ku dhaqan Kenya.
Agaasimaha iyo saraakiisha wehlineysey ayaa kulan la qaatey ku simaha safiirka iyo saraakiisha hadda ka howlgala xafiiska isagoo ka dhageystey warbixino la xariira xafiiska arimaha socdaalka iyo bixinta iyo qaabka uu howlgalo, wuxuuna sidoo kale la kulmay qaar ka tirsan bulshada Soomaaliyeed ee ku nool Kenya.
Xafiiska arimaha socdaalka iyo bixinta baasaboorka ee safaaradda Soomaaliya ku leedahey dalka Kenya ayaa ah kan ugu shaqada ballaaran marka loo eego kuwa la mid ah, waxaana xafiiska isla maanta la wareegey saraakiil cusub oo dhowaan loo soo wareejiyey.
Agaasimaha heyadda socdaalka iyo ku simaha safiirka ayaa kula dardaamey saraakiisha xafiiska ilaalinta sharciga, hagaajinta habka bixinta adeegga, iyo u fududeynta muwaadiniinta adeegyada ay uga baahan yihiin Xafiiska.
Xafiiska Shabakada Allbanaadir.com
Muqdisho Somalia
Allbanaadir@live.com
