Kooxo hubeysan ayaa caawa fiidniamdii weeraray xarunta saldhiga Booliska degmada Yaaqshiid ee Magaalada Muqdisho sida ay sheegayaan wararka degmadaas naga soo gaaraya.
Goob-joogayaal ayaa sheegaya in dabley hubeysan oo aan heybtooda la garan ay rasaas ku fureen saldhiga booliska Yaaqshiid, waxaana ka dib halkaas ka dhacay dagaal kooban oo dhexmaray dableyda iyo ciidankii ku sugnaa saldhigaas.
Rasaasta la isweydaarsaday oo daqiiqado kooban socotay ayaa khal khal iyo cabsi badan ku abuurtay dadka degaanka, waxayna wararku sheegayaan iney baxsadeen dableyda weerarka soo qaaday.
Labo qof oo kala ahaa qof shacab ah iyo askari ka tirsan Booliska ayaa ku dhaawacmay weerarkan oo illaa hadda aan la ogeyn cida ka dambeysay iyo waxa uu salka ku hayey.
Maamulka iyo saraakiisha amniga degmada yaaqshiid ayaan ka hadlin weerarkan oo noociisa aan mudooyinkan looga baran saldhigyada Booliska Muqdisho.
Xafiiska Shabakada Allbanaadir.com
Muqdisho Somalia
Allbanaadir@live.com
