Wasiiradda Amniga Gudaha ee Mareykanka, Kristi Noem, ayaa xaqiijisay in boorsadeedii laga xaday, taasoo noqotay dhacdo layaab leh maadaama qofka dhibbanaha ahi yahay mas’uul sare oo ka shaqeysa arrimaha amniga.
Wasiiraddu waxay sheegtay in ay noqotay dhibbane uu tuug ka xaday boorsadeeda xilli ay ka cashaynaysay makhaayad ku taalla bartamaha magaalada Washington.
Xatooyadu waxay dhacday iyada oo wasiiraddu cunaysay xirmooyinka ukunta ciidda Easter.
Markii su’aal laga weydiiyay dhacdadan iyadoo ku sugnayd Aqalka Cad, way qiratay waxayna sheegtay in arrintu weli aan la xallin.
Shabakadda “CNN” ee Mareykanka ayaa ka soo xigatay ilo amni in adeegga qarsoodiga ah ee ilaalinta u qaabilsan Noem uu dib u eegay muuqaalada kaamirooyinka amniga ee makhaayadda, waxaana la arkay nin aan la aqoon oo xirnaa maaskarada caafimaadka isagoo boorsada ka xadaya kana sii baxaya makhaayadda.
Tuuggu wuxuu la baxay ruqsadda darawalnimada ee Noem, daawooyinkeeda, furaha gurigeeda, iyo baasaboorkeeda.
Intaa kaliya ma ahan, wuxuu sidoo kale qaatay kaarka gelitaanka Wasaaradda Amniga Gudaha, boorsada qurxinta ee wasiiradda, jeegag madhan, iyo qiyaastii $3,000 oo lacag caddaan ah.
Sida ilahani ay sheegeen adeegga qarsoodiga ah ayaa bilaabay baaritaan lagu raadraacayo isticmaalka kasta oo la sameeyo kaararka iyo agabyada maaliyadeed ee Noem.
