Markab shidaal oo ay leedahay shirkad Turkiga laga leeyahay ayaa ku sugnaa dekedii Yemen ee la la beegsaday duqeyn Maraykanku qaaday
Ilo-wareedyo ka tirsan Wasaaradda Arrimaha Dibadda ee Turkiga ayaa xaqiijiyay in markab shidaal oo ay maamusho shirkad Turkiga laga leeyahay uu ku sugnaa dekedda Ras Isa ee xeebta galbeed ee Yemen, xilligii ay Maraykanku ka fuliyeen duqeyn cirka ah fiidnimadii 17-ka Abriil, taasoo lagu bartilmaameedsaday xarun ay gacanta ku hayaan Xuutiyiintu.
Ankara waxay xaqiijisay joogitaanka markab Turkiga ah oo ku sugnaa dekedaas la duqeeyay , iyadoo sheegtay inay arrinta si weyn ula socdaan.
Ilo-wareedyadani waxay sheegeen in markabka ay soo gaareen qasaare  yar balse aysan soo gaarin waxyeello culus oo hor istaagi kara dhaqdhaqaaqiisa.
“Markabku wuxuu isku dayay inuu ka tago dekedda kaddib weerarka, balse maamulka maxalliga ah ee dekedda gacanta ku haya ayaa ka hor istaagay inuu shiraacdo”
Warbixinnadu waxay sheegayaan in dhammaan maraakiibtii halkaas taagnayd laga hor istaagay in ay dhaqaaqaan intii duqeynta Mareykanku socotay, waxayna maraakiibtaasi isugu tageen meel cayiman iyagoo sugaayay xaaladda.
Markabka waxaa saaran 26 shaqaale ah, oo ay ku jiraan 4 Turki ah, midkoodna waa kabtankii markabka, halka inta kale ay yihiin Hindi. Waxaa la xaqiijiyay in dhammaan shaqaalaha markabku caafimaad qabaan.
Wasaaradda Arrimaha Dibadda ee Turkiga oo kaashaneysa safaaradda Turkiga ee Sanca waxay bilowday tallaabooyin lagu hubinayo in markabka laga saaro Yemen.
38 shaqaale ah ayaa ku shahiiday, 102 kalena wey ku dhaawacmeen kadib markii xarunta saliidda ee Ras Issa lagu beegsaday duqeymo cirka ah oo taxane ah, taasoo ah gardarro dagaal oo ay gaysateen ciidanka Maraykanka, laguna bartilmaameedsaday dhammaan shaqaalihii goobta” ayaa lagu yiri war ay soo saartay kooxda Xuutiyiinta Yemen.
