Madaxweynaha Jamhuuriyadda Federaalka Soomaaliya Mudane Xasan Sheekh Maxamuud ayaa tacsi u diray qoyska, ehelada, Ciidanka iyo dhammaan shacabka Soomaaliyeed, geerida Alle ha u naxariistee, Gaashaanle Sare Nuur Maxamed Gaabow (Nuur Farey), Taliyihii Guutada 14-Oktoobar ee Ciidanka Xoogga Dalka Soomaaliyeed.
Madaxweynaha ayaa xusay in Taliye Nuur Farey uu ahaa halgamaa daacad ah oo nolol iyo nafba u huray difaaca Qaranka iyo xorriyadda shacabka Soomaaliyeed, isagoo Alle uga baryay inuu naxariistiisa janno ka waraabiyo dhammaan shuhadada Ciidamada.
Madaxweyne Xasan Sheekh Maxamuud ayaa tilmaamay in Dowladda Federaalka ay wado baaritaan dhameystiran oo ku saabsan weerarkan argagixisanimo
Waxa uu adkeeyey go’aanka adag ee dowladda ee ku saabsan in la sii laba jibbaaro dagaalka lagula jiro kooxaha argagixisada ah ee cadawga ku ah nabadda iyo xasilloonida dalkeenna sida uu hadalka u dhigay.
Nin xirnaa dareeska ciidanka xoogga dalka Soomaaliya ayaa rasaas culus huwiyay sidaasna ku dilay taliyihii guutada ciidanka 14 ka October ee ciidanka xoogga dalka Gaashaanle Sare Nuur Farey Gaabow.
Falkan taliyaha lagu dilay ayaa ka dhacay deegaan katirsan gobolka Shabeelaha Hoose, waxaana wali la ogeyn ninka dilka geestay ee xirnaa dareeska ciidanka in uu ahaa askari ciidanka katirsanaa ama in uu isku ekeesiyay ciidanka katirsanaa Al Shabaab.
Warar soo baxaya ayaa sheegaya in ninka dilka u geestay taliye Nuur Farey isna isla goobta lagu dilay, mana jiraan faah faahino badan oo dowladda Soomaaliya ka bixisay falkan dilka ah ee aadka looga argagaxay.
