Ciidamada difaaca maamulka Puntland, ayaa dagaal adag kula jira dagaalyahanno isugu jira Soomaaliya iyo ajaaniib oo katirsan kooxda Daacish, kuwaa oo fariisimo waa weyn ka sameestay qeybo kamid ah buuraha gobolka Bari , gaar ahaan kuwa Calmiskaad.
Dagaalka ka socda buuraha Calmiskaad ciidamada Puntland waxa ay ku dileen dagaallamayaal badan oo katirsanaa kooxda Daacish, kuwaa oo isugu jira Soomaali iyo ajaaniib ay ku jiraan xubno la sheegay in ay ahaayeen saraakiil.
Lataliyaha Madaxweynaha Puntland ee arrimaha amniga Cabdi Xirsi Cali Qarjab , ayaa sheegay inta badan xubnaha Daacish katirsan ee ka dagaallamaya buuraha Calmiskaad in ay yihiin ajaaniib, waxa uuna tilmaamay tirada Soomaalida kooxdaasi katirsan in ay yar yihiin.
Qarjab, ayaa xusay in xubnaha ugu badan ee ciidamada Puntalnd ku dileen dagaalka ka socda buuraha Calmiskaad ay yihiin ajaaniib, waxa uuna tilmaamay in tirada Soomaalida lagu dilay howlgalka socda kaliya ay yihiin labo nin .
“Dhammaan dadka meesha ka dagaalamaya ee laysugu keenay waa ajaaniib safar u soo galay inay dhibaateeyaan umadda Soomaaliyeed ee reer Puntland, waana argagixiso adduunka laga baadi goobayo. Dadka ilaa hadda lagu diley dagaalka dhammaan waa ajaaniib isugu jirta Carab iyo Afrikaan, ilaa hadda laba ruux oo keliya ayaa lagu diley wax Soomaali ah oo nimankaa ka dhinac dagaalamayey” ayuu yiri Qarjab.
Puntland ayaa marar badan soo bandhigtay meydadka xubno badan oo katirsanaa kooxda Daacish kuwaa oo lagu dilay buuraha gobolka Bari, dadkaasi la dilay ayaana u badnaa ajaaniib dalal kala duwan oo Carab u badan ka kala yimid.
Xafiiska Shabakadda Allbanaadir.com
Muqdisho Somalia
Allbanaadir@live.com
