Madaxweynaha Soomaaliya Xasan Sheekh Maxamuud oo tixraacaya soo jeedinta Wasiirka Wasaaradda Gaashaandhigga Soomaaliya ayaa Taliyaha Ciidanka Badda u Magaacabay S/Guuto Cabdiwahaab Cabdullaahi Cumar.
Madaxweynaha ayaa wareegtada ku sheegay dadaalka ay dowladdu ku bixinayso tayeynta Ciidanka Badda Soomaaliyeed, si ay ula wareegaaan amniga iyo difaaca xuduudaha badeed ee dalkeenna, taasoo muhiim u ah qarannimada iyo midnimada.
Madaxweyne Xasan Sheekh ayaa ku ammaanay Taliyihii hore ee Ciidanka Badda Admiral Cabdi Warsame shaqadii uu kasoo qabtay ciidanka Badda intii uu xilka hayay, waxa uuna kula dardaarmay Taliyaha cusub in uu sii labo laabo waajibaadka qaran ee loo idmay.
Somalia ayaa waxaa ka jira ciidan badeed oo aan awoodii loo baahnaa laheyn ka dib markii ciidanka badda iyo difaaca xeebaha ay ku burbureen dagaaladii sokeeye ee dalka ka dhacay, waxaana xeebaha Somalia ka jira kaluumeyso xoog badan oo sharci daro ah kuwaasoo ay sameynayaan maraakiib shisheeye oo u baahan in laga hortago.
