Waxaa la filayaa in dhawaan in dib u furmo kulamada xildhibaanada Golaha Shacabka ee Baarlamaanka Federaalka Soomaaliya, oo ku jiray fasaxa bishii Ramadaan iyo sidoo kale maalmaha ciidda, waxaana la wada sugayaa ajandayaasha ugu horreeya ee xildhibaannada diirada saari doonaan.
Sida aan xogta ku heleyno xildhibaanno katirsan Golaha Shacabka ayaa hadda miiska u saaran yahay mooshin ka dhan ah Ra’isul Wasaaraha Soomaaliya Xamse Cabdi Barre oo ay ku eedeeyeen in uu ku fashilmay howlihii loo igmaday.
Xildhibaannada mooshinka diyaarinaya qaarkood , ayaa sheegay in muhiim tahay in uu dhaco isla xisaabtan dhab ah, waxa ayna xuseen in hadda mooshinkan diyaar yahay ayna la sugayaan kaliya furitaanka kulamada golaha oo fasax galay.
Mooshinkan ayaa hadal heyntiisa horey u socotay, taa oo keentay in xitaa dib u dhaco kalfadhigii Baarlamaanka, iyadoona markii la furay kalfadhiga Baarlamaanka haddana maalmo kaddib xildhibaannada la galiyay fasaxa bishii Ramadaan iyo maalmaha ciidda.
Madaxtooyada Soomaaliyam, ayaa dhankeeda wada qorshayaal mar kale lagu fashilinayo mooshinkan xildhibaannada qaar ka wadaan Xukuumadda Xamse Cabdi Barre, waxa ayna Villa Soomaaliya kula heshiisay guddoonka Golaha Shacabka in aysan qaban wax mooshin oo Xamse ka dhan ah.
Xukuumadda Xamse Barre, ayaa ku fashilantay la dagaalanka waxa loogu yeero argagaxisada, waxaa sidoo kale Ra’isul Wasaaraha lagu eedeeyay in xukuumadiisa tahay mid fadhiis ah oon qaban wax muuqda, kuna fashilantay la shaqeynta maamul goboleedyada dalka ka jira qaarkood.
Xafiiska Shabakadda Allbanaadir.com
Muqdisho Somalia
Allbanaadir@live.com
