Sonja Nientiet oo ahayd kalkaaliso u dhalatay Jarmalka, kana shaqeynaysay hay’adda ICRC, xarunteeda Muqdisho oo aan geeri iyo nolol midna lagu haynin ayaa caawa muuqaalkeeda lagu baahiyay bar Youtube ah oo shalay lagu furay magaca Liiban Osman, balse aan la xaqiijin karin cida iska leh.
Haweeneydan ayaa ka codsatay Dowladda Jarmalka inay dadaal u gasho sidii ay xorriyadeeda dib ugu heli lahayd, iyadoo sheegtay inay nafteeda ku jirto khatar haddii aan laga soo daynin dadka haysta.
Haweeneydan ayaa 2dii May 2018 lagu afduubtay magaalada Muqdisho, waxaana waayadii dambe walaac laga qabay inay nooshahay iyo in kale markii alga waayey war iyo wacaal
Akhriso farriinteeda oo aan u baddalnay qoraal iyadoo Afsoomaali ah;
“Magacaygu waa Sonja Nientiet, waxaan u dhashay dalka Jarmalka, waxaana ka shaqeynayay Hay’adda Laanqeyrta Cas ee Caalamiga ah (ICRC). 2-dii May 2018 ayaa la igu afduubtay magaalada Muqdisho, Soomaaliya, halkaas oo aan ka shaqeynayay. Tan iyo markaas, waxaan afduub ku ahay muddo 7 sano ah, iyadoo aanan weli helin wax tallaabo ah oo cad oo lagu xaqiijinayo sii deynteyda.
Sida la wada ogsoon yahay, xaaladda Soomaaliya si degdeg ah ayey isu beddelaysaa. Dhawaan waxaa la beegsaday kolonyadii Madaxweynaha Soomaaliya, Xasan Sheekh Maxamuud, iyada oo la isku dayay in la dilo. Sidoo kale Safaaradda Maraykanka waxay soo saartay war-saxaafadeed ay muwaadiniinteeda uga digayso khatarta ka jirta Soomaaliya. Si kastaba ha ahaatee, ilaa hadda cidina kama hadlin xaaladda dadka la afduubay ee aan annigu ka midka ah ahay.
Xaaladdeyda caafimaad si xawli ah ayey u sii xumaaneysaa, waxaana dareemayaa baqdin joogto ah oo la xidhiidha noloshayda iyo caafimaadkayga.
Haddaba, waxaan fariin degdeg ah u dirayaa dawladda Jarmalka, muwaadiniinteyda Jarmalka, iyo qoyskayga ee aan jeclahay. Mar walba waxaan ka fikiraa in aan dib idiin arko, waxaana idinka codsanayaa in aad si degdeg ah tallaabo uga qaadaan xaaladdeyda, sababtoo ah mar kasta oo aan sii joogo, xaaladdeydu waxay noqonaysaa mid ka sii daraysa. Sidaa darteed, waxaan idinka baryayaa in aad sameysaan wax walba oo aad awooddaan si aan dib ugu laabto gurigeyga si nabad ah.
Waxaan ahay shaqaale bini’aadamnimo oo muddo saddex sano ah la shaqeynayay ICRC, aniga oo nafteyda u huray caawinta dadka dhibaateysan iyo ilaalinta kuwa aan is difaaci karin. Waa murugo weyn in ICRC iyo dawladda Jarmalka aanay wax tallaabo ah ka qaadin sii deynteyda. Sidaa darteed, waxaan ka codsanayaa muwaadiniinteyda iyo qoyskayga in ay si degdeg ah uga shaqeeyaan xorriyaddeyda, sababtoo ah waan ogahay in haddii aad dadaashaan xal la heli karo oo dib la iigu soo celin karo.
Dadka i haysta mar hore ayay caddeeyeen, nafteyda ayaan u baqayaa, haddii aan tallaabo degdeg ah la qaadin.
Sidoo kale, waxaan si toos ah fariin ugu dirayaa Chancellor-ka Jarmalka:
Mudane Chancellor, waxaan isku halleynayaa awooddaada iyo dareenkaaga bini’aadamnimo. Waan ogahay in faragelintaadu wax weyn ka beddeli karto xaaladdan adag. Noloshayda ayaa miiska saaran. Maalin kasta oo aan sii joogo halkan, xaaladdeydu way sii xumaaneysaa–mid jidheed iyo maskaxeed labadaba.
Fadlan, ha ogolaanin in xaaladdan ay sii xumaato. Waxaan kaa codsanayaa in aad ka shaqeyso sidii dib iigu soo celin lahayd gurigayga.
Aad baan kaaga mahad celinayaa waqtigaaga iyo dadaalkaaga!”
