Diyaarad nuuceedu ahaa BUFALLO 5Y- RBA Cargo, ayaa galabta ku dhacday duleedka magaalada Muqdisho, gaar ahaan aagga deegaanka Jaziira ee gobolka Shabeelaha Hoose.
Sida aan xogta ku helnay diyaaradan ayaa jihada ka luntay, waxa sidoo kale wararku sheegayaan in cillad ku timid diyaaradan oo nuuceedu ahaa kuwa qaada xamuulka kana timid degmada Dhoobley.
Diyaaradan dhacday, ayaa la sheegay in ay la socdeen afar qof oo ahaa shaqaalaha diyaarada , waxaana wararku sheegayaan in saddex kamid dadkii la socday diyaarada geeriyoodeen halka mid kalana uu soo gaaray dhaawac culus.
Ciidamada amaanka dowladda Soomaaliya , ayaa si deg deg ah u gaaray goobta diyaaradu ku dhacday, waxaana socda baaritaano ku aadan sababta keentay in diyaaradan soo dhacdo.
