Soomaaliya ayaa ka qeyb galeysa Bandhigga 2aad ee Dhaqanka, Fanka iyo Farshaxanka Bariga Afrika oo ka dhacaya magaalada Addis Ababa ee dalka Ethiopia.
Wasiirka Warfaafinta, Dhaqanka iyo Dalxiiska ee dowlada Federaalka Soomaaliya, Mudane Daa’uud Aweys Jaamac iyo wafdi uu horkacayo ayaa gaarey magaalada Addis Ababa si ay uga qeyb qaataan kulankaasi ballaaran oo ay ka qeyb gelayaan Wasiirrada Dhaqanka ee dalalka Soomaaliya, Burundi, Uganda, Rwanda, Djibouti, Koonfuurta Suudaan, Jamhuuriyadda Dimoqraadiga ee Congo, Tanzania, Kenya iyo Ethiopia oo martigelineysa.
Kulankaasi waxaa maanta si rasmi ah magaalada Addis Ababa uga furay Ra’iisul Wasaare Ku- Xigeenka Ethiopia Mudane Temesgen Tiruneh.
Wasiirka Warfaafinta, Mudane Daa’uud Aweys ayaa sheegay in kulankan ujeedkiisu yahay in dhaqanka loo adeegsado xoojinta, isku xirka, xiriirka diblomaasiyadeed, is dhexgalka bulshada iyo iskaashiga dalalka Bariga Afirka.
Munaasabadan oo hal-ku-dhig looga dhigay “Fanka iyo Dhaqanka oo loo Adeegsanayo Is-dhex-galka Gobolka” ayaa kulmisa bulshooyinka ku dhaqan dalalka Gobolka Bariga Afrika.
