Dagaallamayaal katirsan kooxda Al Shabaab , ayaa saakay oo Sabti ah weerar culus oo ku bilowday qaraxyo gaadiid laga soo buuxiyay waxa ay ku qaadeen saldhig ay ciidanka xoogga dalka Soomaaliya kaga sugnaayeen degmada Awdheegle ee gobolka Shabeelaha Hoose.
Qaraxyada kaddib ayaa la sheegay in dabley hubeysan oo katirsan Al Shabaab weerar toos ah ku qaadeen saldhigga ciidanka xoogga , waxaana halkaasi ka dhacay dagaal xooggan oo dhax maray labada dhinac ciidanka dowladda iyo maleeshiyaadkii weeraray.
Dadka deegaanka ayaana maqlayay daryanka rasaasta culus ay labada dhinac is dhaafsanayeen, waxaana jira khasaaro badan oo isuu jira dhimasho iyo dhaawac oo labada dhinac kala gaaray, lamana oga ilaa hadda dhinaca shacabka khasaaraha soo gaaray.
Dagaalka ayaana wali lagu soo waramayaa in uu ka socdo degmada Aydheegle oo saakay kooxda Al Shabaab sanado kaddib weerar culus ku qaaday, waxaana degmada u baxay ciidamo kale oo katirsan dowladda oo u gurmanaya ciidankii la weeraray.
Weerarada nuucan ah oo ay fuliyaan kooxda Al Shabaab ayaa muddooyinkan aad ugu yaraa gobolka Shabeelaha Hoose oo horey uga dhici jireen, waxa uuna weerarkan imaanayaa xilli ay kooxda Al Shabaab dib isku soo abaabuleen kuna soo laabteen deegaanno katirsan Hirshabelle.
Xafiiska Shabakadda Allbanaadir.com
Muqdisho Somalia
Allbanaadir@live.com
