Dagaal ayaa galabta ka dhacay agagaarka degmada Balcad ee gobolka Sh/dhexe kaasoo dhexmaray ciidamada dowlada iyo xoogag taabacsan Al-Shabaab.
Wararka ayaa sheegaya in dagaalkan uu ka dhacay halka loo yaqaan Haanta Shiikh oo dhowr km dhinaca woqooyi kaga toosan degmada Balcad.
Daryanka rasaas iyo qaraxyo la isku adeegsanayey ayaa laga maqlayey gudaha degmada galabta illaa caawa maqribkii sida ay sheegayaan goob joogayaal ku sugan degmadaas.
Saraakiil ka tirsan ciidamada dowlada ayaa sheegay iney iska caabiyeen weerar kooxda Al-Shabaab ku soo qaadeen fariisin ay ku leeyihiin duleedka degmada Balcad ayna khasaare xoogan gaarsiiyeen iyagoo sheegay iney hayaan meydadka rag ay ka dileen.
Al-Shabaab dhinacooda war lagama hayo, mana jiraan warar madax banaan oo xaqiijinaya khasaaraha rasmiga ah ee ka dhashay dagaalkan.
Xaalada goobihii lagu dagaalamay ayaa caawa degan sida ay sheegayaan wararkii ugu dambeeyey ee halkaas naga soo gaaraya, waxaana la geeyey ciidamo dheeraad ah oo ka tirsan Milateriga Somalia.
Xafiiska Shabakada Allbanaadir.com
Muqdisho Somalia
Allbanaadir@live.com
