Itoobiya iyo Soomaaliya ayaa bilaabay wada-xaajoodyo farsamo oo ku saabsan sidii loo dhaqangelin lahaa baaqii Ankara, iyadoo wareegii koowaad ee wada-hadallada uu ka dhacay magaalada Ankara ee dalka Turkiye.
Wada-hadalka ayaa ujeedkiisu yahay in la sahmiyo siyaabaha lagu dhaqangelin karo Baaqa Ankara iyo in la abuuro nabadda, xoojinta iskaashiga, iyo dhisidda xiriir diblomaasiyadeed oo ku saleysan is-faham sida uu sheegay Wasiirka Warfaafinta, Dhaqanka, iyo Dalxiiska ee Soomaaliya, Daud Aweis
HOOS KA AKHRISO WAR SAXAAFADEED KA SOO BAXAY DOWLADA SOMALIA
Wajiga koowaad ee wadahadallada farsamo ee u dhexeeya Soomaaliya iyo Itoobiya, ee ku saleysan Bayaankii Ankara ee la ansixiyey 11-kii Diseembar 2024, ayaa maanta ka dhacay magaalada Ankara.
Wadahadalladan waxaa martigeliyey Wasiirka Arrimaha Dibadda ee Turkiga Hakan Fidan, iyadoo ay ka qeyb galeen wafdiyo ay hoggaaminayeen Mudane Cali Maxamed Cumar, Wasiiru Dowlaha Arrimaha Dibadda ee Soomaaliya iyo Dr. Gedion Timothewos, Wasiirka Arrimaha Dibadda ee Itoobiya.
Iyadoo laga anbaqaadayo bayaankii ka soo baxay shirkii, Madaxweynaha Soomaaliya Xasan Sheekh Maxamuud, Ra’iisul Wasaare Abiy Axmed Cali iyo Madaxweyne Recep Tayyip Erdoğan ay horay ugu yeesheen Turkiga ayaa shirkaan maanta lagu soo bandhigay aragtiyo lagu horumarinayo mustaqbal barwaaqo iyo xasillooni leh.
Intii lagu guda jiray wajiga koowaad ee wadahadallada farsamo, labada wafdi waxay muujiyeen sida ay uga go’an tahay dhaqan-gelinta qodobada iyo nuxurka bayaank Ankara.
Wafdiyadu waxay billaabeen shaqo dhab ah oo lagu hirgelinayo aragtidaas, iyagoo isla gartay horumar waara oo labada dhinacba dan u ah.
Labada wafdi waxay uga mahadcelinayaan Türkiye sida ay uga go’an tahay diyaarinta marxaladda xigta ee wadahadallada farsamo, oo lagu wado inay qabsoomaan bisha Maarso 2025.
