Hay’addaha amaanka Caasimadda Somalia ee Muqdisho ayaa sheegay in Howlgalkii shalay ka dhacay Degmada Cabdicasiis loo soo qabtay 3 eedeysane oo mid ka mida uu dhaawac yahay
Raggan ayaa ku eedeeysan ineyu weerareen Taliyihii Saldhigga Boliiska Cabdicasiis oo fulinayay amar Maxkammadda ka soo baxay.
“Waxaana lagu sooo qabtay 3, sadax eedeysane iyo laba Qori oo mid Zaban yahay oo ay wateen waxaana socota baaris iyo ka gungaarista cidii soo abaabushay fal danbiyeedkaas waxaana la horgeyn doonaa Maxkamada awooda uleh” ayaa lagu yiri qoraal ka soo baxay Booliska DF.
Raggan ayaa ku lug lahaa dagaal shalay galab ka dhacay degmada Cabdicasiis ee gobolka Banaadir kaasoo la sheegay inuu u dhexeyey ciidamada amaanka ee dowladda iyo rag hubaysan oo uu hoggaaminayey sarkaal ka tirsan ciidanka Booliska.
Dagaalka ayaa ka bilowday guri ku yaalla Waaxda Neero ee degmada Cabdicasiis dhanka xigta Mirinaayo kaasoo la isku haystay Maxkamadduna amartay inaan la dhisi karin illaa amar dambe balse dhisme lagu bilaabay amarka Maxkamadda kadib.
Ciidamo boolis ah ayaa tagay guriga si ay u joojiyaan dhismaha waxaana sidaas ku bilowday dagaalka markii ay ka hor yimaadeen ciidamo kale oo ku sugnaa dhismaha.
