Ra’isul Wasaare ku-xigeenka dalka Mudane Cabdisalaan Cabdi Cali ayaa daahfuray munaasabad lagu soo bandhigayey saxiixa heshiiska shirkadaha loo qaatay tartanka dhismaha qaar ka mid ah dayactirka iyo dib u dhiska waddooyinka Magaalada Muqdisho, kaasoo si rasmi ah u saxiixay Guddoomiyaha Gobolka Banaadir Ahna Duqa Magaalada Muqdisho Mudane Maxamed Axmed Amiir.
Dhawaan ayaa tartan la xariira qandaraasyada dhismaha qaar ka mid waddooyinka Caasimadda loo qabtay 28-shirkadood, waxaana tartankaasi ku soo baxay afar shirkadood oo kala ah 1-Kulmiye, 2-Docol, 3-Dhis, 4- Buruuj, waxaana goobta ay munasaabadan ka dhaceysay goob joog ka ahaa Wasiiro iyo Xildhibaano ka tirsan DFS, Ganacsato iyo qeybaha Bulshada.
Wadooyinka la dhiso doono ayaa ah kuwa muhiim u ah isku socodka Magaalada iyo bilicda Caasimadda kuwaas oo kala ah, 1- Keydsaneey, 2- Dhameystirka Waddada Dayniile, 3-Waddada weyn ee Dagmada Kaxda, 4-Wadada Isbitaal Madiino, 5-wadada Nasiib-Buundo ilaa madaxtooyada, 6-Waddooyinka xiriiriya Shangani iyo via Rooma ee Degmada Xamar Weyne, dhismaha waddooyinkaasi ayaa la rajeynayaa in dhawaan shaqaadooda bilaabato.
Wasiirka Howlaha Guud ee XFS Mudane Cilmi Maxamud Nur ayaa bogaadiyay mashruuca Nagaad iyo fulintiisa oo wax weyn ka badali doono bilicda Magaalada.
Guddoomiyaha Gobolka Banaadir Ahna Duqa Magaalada Muqdisho Mudane Maxamed Axmed Amiir ayaa bogaadiyay mashruuca Nagaad ee gobalka Banaadir kaas oo ah mashruuc qeyb weyn ka qaatay horumarinta bilicda Caasimadda, gaar ahaan dib udhiska Waddooyinka iyo kaabashayaasha dhaqaalaha, iyada oo ugu dambeyn Gudoomiye Amiir kula dardaarmay shirkadaha qansaraaska helay in si tayo leh udhisaan waddooyinka.
Ra’isul wasaare ku-xigeenka dalka Mudane Cabdisalaan Cabdi Cali ayaa ku amaanay Maamulka Gobolka Banaadir sida ay oga go’an tahay in Caasimadda ay la jaan qaado Magaalooyinka dhigeeda ee horumaray.
Waxaa uu sheegay in Xukuumadda Danqaran ay ka go’an tahay hirgalinta iyo dhismaha waddooyinka isku xira caasimadda, si kor loogu qaado nabadda iyo is-dhexgalka bulshada ku nool gobolka Benaadir.
Ra’isul Wasaare ku-xigeenka dalka Mudane Cabdisalaan Cabdi Cali ayaa ku amaanay Maamulka Gobolka Banaadir sida ay uga go’an tahay in Caasimadda Muqdisho ay la jaan qaado caasimaddaha dhigeeda ee caalamka.
