Ciidanka Jubbaland iyo kuwa Kumaandooska Gaarka ah ee Danab ayaa si wadajir ah howlgal qorsheysan uga fuliyay deegaanka Wayaanta ee Gobolka Jubbada Hoose halkaasoo ay ku sugnaayeen Al Shabaab
Howlgalka oo ahaa mid si xeeladaysan loo qorsheeyay, waxaa ujeedkiisu ahaa in lagu bartilmaameedsado godad dhulka hoostiisa ah oo ay al shabaab ku jireen, iyadoo howlgalku ku bilaabmay madaafiic xooggan oo lagu riday goobta, kadibna ciidanka ayaa si toos ah ula wareegay deegaanka.
Ciidamada Jubbaland iyo Kumaandoska Danab ayaa ku guuleystay in ay dhulka la simaan godadkii ay Al shabaab ku jireen, iyadoo meydad badan godadkaas loogu tagay.
“Ciidanku waxay weli ku daba jiraan firxadka Khawaarijtii ka carartay godadkoodii, iyadoo la filayo in hawlgalku sii socdo ilaa si buuxda aagaasi looga ciribtirayo Kooxda Khawaarijta” ayuu yiri sarkaal ka tirsan ciidanka
