Kanaalka ku yaal xaafad ka tirsan caasimadda Argentina ee Buenos Aires ayay biyihiisu isu beddeleen casaan maalintii Khamiista, taasoo cabsi gelisay dadka deegaanka.
Sawirro iyo muuqaallo ayaa muujinaya biyaha ay aadka midabkooda isku baddeleen oo ku qulqulaya jiinka webiga, Rio de la Plata, oo xuduud la leh kaydka deegaanka.
Warbixinnada warbaahinta maxalliga ah ayaa soo jeedinaya in midabku uu ka dhashay daadinta dheeha dharka, ama qashinka kiimikaada ah ee kaydka u dhow.
Wasaaradda deegaanka ayaa bayaan ay soo saartay ku sheegtay in muunado biyo ah laga soo qaaday kanaalka Sarandà si loo ogaado sababta keentay isbeddelka midabka.
Gelinkii dambe isbadalka midabka biyuhu waxa uu lumiyay xawaaraha iyo awoodda biyaha, sida ay ku warrantay wakaaladda wararka ee AFP.
Dadka deegaanka ayaa ku andacoonaya in shirkado badan oo maxalli ah ay ku daadiyaan qashinka sunta ah ee marin biyoodka, kuwaas oo dhex mara dhul lagu farsameeyo hargaha iyo warshadaha dunta oo 10 kiilomitir u jira bartamaha caasimadda.
Mid ka mid ah dadka deegaanka, oo ah haweeney lagu magacaabo Silvia, ayaa u sheegtay warbaahinta maxalliga ah ee C5N in inay jirtay, “marar kale ay biyuhu jaalle noqdeen, waxayna yeesheen ur aysiidh ah oo nagu sababtay in dhuunta ay na xanuunto”.
