Ciidamada sida gaarka ah u tababaran ee loogu tala galay la-dagaallanka argagaxisada , ayaa howlgal gaar ah ay ka sameeyeen magaalada Kismaayo waxa ay ku dileen xubno katirsanaa Al Shabaab , kaddib markii loogu tagay guri ay ku sugnaayeen.
Warbaahinta maamulka Jubbaland . ayaa baahisay in ciidamada oo kudaba jiray saddex nin oo katirsanaa kooxda madaxjabiska ee Al Shabaab ay tageen guriga kuyaall magaalada Kismaayo halkaas oo ay ku dileen labo nin oo kamid ahaa raggii ay ciidamada raadinayeen, halka mid kalana nolosha lagu qabtay.
Saraakiisha ciidamada maamulka Jubbaland ee hoggaamineysay howlgalka ayaa sheegay in raggan la toogtay iyo midka la qabtay ay qorsheenayeen in magaalada Kismaayo ka fuliyaan falal dil ah ayna ciidamada heleen xogta raggan kana hortageen.
Ammaanka magaalada Kismaayo ayaa si weyn loo adkeeyay muddooyinkii lasoo dhaafay, waxaana aad u yar falalka amnidarro sida dilalka madaxjabiska iyo qaraxyada , waxaana la sheegay in ciidamada Jubbaland heegan ugu jiraan kahortagga falalka ammaandarro.
Xafiiska Shabakada Allbanaadir.com
Muqdisho Somalia
Allbanaadir@live.com
