Xoogaga hubeysan ee ku sugan Marinka Qaza ayaa sii daayay shan qof oo u dhashay Thailand iyo saddex Israa’iili ah, iyagoo u gacan galiyay Laanqayrta Cas , Waxay qeyb ka ahayd isweydaarsiga maxaabiista iyadoo lagu wado in 110 Falastiiniyiin ah laga sii daayo xabsiyada Israel.
Warar soo baxay ayaa sheegaya in Israa’iil ay hakisay inay sii deyso 110 maxbuus oo Falastiiniyiin lagu beddelanayo kuwa maanta ay sii deysay Xamaas, iyadoo Israa’iil ay ku andacoonayso inay u baahantahay ka hor inta aysan sii deyn maxaabiista Falastiiniyiinta, dammaanad qaad caalami ah oo la xiriira in si badqab leh loo sii deynayo maxaabiista ay gacanta ku heyso Xamaas
Waxay sheegeen labada maxbuus ee maanta la sii daayay inay khatar kala kulmeen goobtii lagu wareejinayay oo ay dad badan hareereeyeen labada maxbuus intii la saarayay gaadiidka hay’adda laanqayrta cas.
Dadka la sii daayey waxaa ka mid ah Arbel Yehud oo ah maxbuuska ugu muhiimsanaa ee Israa’iil oo dhowr howlgal oo gaar ah ay Israa’iil ka fulisay Qasa si ay u helaan , sidoo kalena toddobaadkii hore mar ku dhaweysay in heshiiska uu u burburo, sabab la xiriirta inaan waqti hore la sii deyn
Ma jirin wax soo bandhigis gaar ah, isla markiiba ururka laanqayrta cas ayaa lagu wareejiyay. Israa’iil waxay ku sheegtay gabadhan oo ah midda kaliya ee xataa Netanyahu u si gaar ah u raadinayay inay tahay rayid, laakin Xamaas ayaa taas diidday oo ku sheegtay qof muhiim ah oo ka tirsan wasaaradda difaaca Israa’iil.
Dhinaca kale, telefishinka Al Jazeera ayaa ku warramay in shanta galabnimo waqtiga Falastiin la sii deyn doono maxaabiista Falastiiniyiinta ee la hakiyay sii deyntooda, kaddib dadaal ay sameeyeen dhex dhexaadiyayaasha.
Israa’iil, waxay ku dhibtoonaysa habka ay Xamaas dunidda horteeda ugu ceebaynayso, kaddib markii saacadaha sii deynta maxaabiista Israa’iil ay socoto ay noqdeen kuwa argagax ku riday Israa’iil, sabab la xiriirta inay Xamaas waqtigaa u rogtay xilli ay soo bandhigto cududeeda iyo farriimo dunidda lagu soo bandhigayo guul-darrada iyo fashilka dagaal ee Israa’iil iyo xulafadeeda ay ka qaateen Qasa.
Waxaa u dambeysay maanta oo la soo bandhigay sawirrada guutooyinka Israa’iil ee laga saaray dagaalka markii khasaare badan lagu gaarsiiyay gudaha Qasa iyo hub laga furtay ciidanka Israa’iil.
Maxaabiis isweydaarsigan ayaa qeyb ka ah, heshiis ay dhexdhexaadiyiin dowladaha Mareykanka, Masar iyo Qatar. Heshiiska ayaa isugu jira xabbad joojin ka dhaqan gashay Gaza, dib ugu laabashada Falastiiniyiinta ee Waqooyiga Gaza, iyo is weydaarsiga dadka lakala hayo.
Maxaabiista Falastiiniyiinta ee la filayo in maanta lasoo daayo waxaa ka mid ah, Zakariya Zubeydi, oo horay uga tirsanaa dagaalyahannada Falastiiniyiinta.
Sannadki 2021-ki ayuu si la yaab leh uga baxsaday xabsiga, arrintaasi oo ka farxisay Falastiiniyiinta, aadna uga yaabisay ciidanka amniga Isra’il.
Wajiga koowaad ee heshiiska Xamas iyo Isra’il ayaa la filayaa in lagu sii daayo ilaa 2,000 oo Falastiiniyiin ah, halka Xamas ay sii deyn doonto 33 ka mid ah la heystayaasha Isra’iiliyiinta ee lagu hayo Gaza.
HOOS KA DAAWO SAWIRADA
