Howlgal caalami ah oo ka dhan ah argagixisada, kana dhacay Bariga Afrika, ayaa sababay in la soo xiro 37 qof oo looga shakisan yahay falal argagixiso, iyadoo sidoo kale lagu qabtay hub fudud iyo hub culus labadaba.
Dadka la soo qabtay ayaa waxaa ka mid ah xubno looga shakisan yahay inay ka tirsan yihiin kooxaha Daacish, Al-Shabaab, iyo dhowr dagaalyahan oo shisheeye ah.
Xarigga dadka ayaa ka kala dhacay siddeed dal oo ku yaalla Bariga Afrika intii lagu guda jiray howlgal wadajir ah oo ay fuliyeen booliska caalamiga ah INTERPOL iyo booliska Afrika ee AFRIPOL (November-December 2024).
Howlgalka ayaa ujeedkiisu ahaa in lagu aqoonsado laguna soo xiro dad looga shakisan yahay inay xiriir la leeyihiin argagixisada, iyo in la adkeeyo kontoroolka xuduudaha muhiimka ah.
Dalka Kenya, booliisku waxay soo xireen 17 qof oo ay ku jiraan laba looga shakisan yahay inay xubno ka tirsan yihiin Daacish, dhowr dagaalyahan oo shisheeye ah, iyo kuwo kale oo ku lug lahaa maalgelinta argagixisada, xagjirnimada, iyo dacaayadaha.
Booliiska Jamhuuriyadda Dimuqraadiga ee Congo waxay soo xireen afar qof oo lagu eedeeyay inay xubno ka yihiin Jabhadda Isbahaysiga Dimuqraadiga (ADF) iyo laba qof oo kale oo la shaqaynayay. Ciidammadu waxay sidoo kale qabteen oo burburiyeen gantaal iyo qalab ka-hortagga taankiyada oo ay ka tageen dad looga shakisan yahay inay argagixiso yihiin.
Soomaaliya, mas’uuliyiintu waxay soo xireen saddex qof, oo ay ku jirto haweeney looga shakisan yahay inay samayso bambooyinka, una qaabilsanayd qaybta Amniyaatka ee Al-Shabaab, taasoo dhigi jirtay walxaha qarxa ee guryaha lagu sameeyo, iyadoo bartilmaameedsanaysay ciidamada ammaanka iyo milatariga.
Mid kale oo ka mid ah dadka la soo xiray ayaa ahaa xubin ka tirsan Al-Shabaab oo la rumeysan yahay inuu weeraray dhowr goobood oo ay booliisku leeyihiin, isaga oo adeegsanaya bambooyinka gacanta laga tuuro.
Hay’adaha sharci-fulinta ee Tanzania waxay soo xireen xubin lagu eedeeyay inuu ka tirsan yahay kooxda Daacish ee Mozambique, iyo sidoo kale muwaadin Ugandan ah oo isku dayayay inuu ku biiro koox argagixiso ah oo ku sugan Mozambique, isagoo ah dagaalyahan shisheeye ah.
Ka hor inta uusan howlgalku bilaaban, waddan kasta oo ka qayb qaadanayay wuxuu diyaariyay qorshe hawleed, isagoo uruuriyay xogaha sirdoonka ee la xiriira bartilmaameedyada argagixisada, oo ay ku jiraan shaqsiyaadka iyo goobaha ay ku sugan yihiin.
INTERPOL iyo AFRIPOL ayaa mideeyay oo falanqeeyay xogtan, waxayna la wadaageen dhammaan waddamada ka qayb qaadanaya, taasoo fududaysay is-weydaarsiga xogaha dambiyada.
Intii lagu jiray qeybta farsamada ee howlgalka, waddan kasta wuxuu fuliyay baaritaanno istiraatiiji ah iyo weerarro. Booliiska ayaa taageero toos ah ka helay saraakiisha INTERPOL iyo AFRIPOL, kuwaasoo bixiyay isku-duwid, saadka, iyo falanqaynta xogta waqtiga dhabta ah.
