Saraakiisha Hawlgalka Ciribtirka Kooxaha Argagixisada ah ee Puntland ayaa u sheegay in 24-saac ee u danbeeyay Ciidamadu soo rideen ilaa lix drone oo ay kooxda Daacish isku dayday in ay adeegsato.
“24-kii saac ee u danbeeyay Ciidanku waxay soo rideen ugu yaraan 6-drone oo Argagixisada Daacish isku dayday inay isticmaalaan” ayaa lagu yiri War kooban oo ka soo baxay Hawlgalka Ciribtirka Kooxaha Argagixisada ah ee Puntland.
Ciidamada difaaca Puntland ayaa tan iyo bilowgii Hawlgalka Calmiskaad waxay soo rideen in ka badan 50 drones-ka yar yar ah oo mileeshiyaadka Daacish qaraxyo ku soo xireen si ay waxyeello ugu geystaan ciidamada.
Dhinaca kale, Taliye Fu’aad Xannaano iyo hal askari oo ka tirsan ciidankii la socday ayaa ku dhaawacmay kaddib markii miino la kacday Taliyaha iyo Ciidamadu hoggaaminayay oo hawlgal ka waday buuraha Calmiskaad ee gobolka Bari.
Wararka ayaa sheegaya in taliyaha iyo ciidanka uu hoggaaminayay socdaal lug ah ku jireen markii uu qaraxa miino la kacay, dhowaan ayeyna aheyd markii lix ka mid ah ciidamada Puntland ay ku naf waayeen miino la kacday.
