Madaxweynaha la doortay ee Maraykanka, Donald Trump, ayaa qorsheynaya inuu munaasabadda dhaartiisa ku qabto gudaha dhismaha Congresska ee Capitolka Isniinta soo socota, sababo la xiriira cimilada aadka u qabow ee la filayo.
Sida saadaasha hawada sheegtay, maalinta dhaarta, heerkulka magaalada Washington, D.C., ayaa la filayaa inuu aad hoos ugu dhaco, taas oo ka dhigaysa munaasabadda dhaarta Trump tan ugu qabow 40-kii sano ee lasoo dhaafay.
Trump ayaa bartiisa Truth Social ku sheegay inuu xil ka saaran yahay ilaalinta dadka iyo dalka, balse saadaasha hawada oo muujinaysa qabow daran iyo dabaylo ayaa keentay inuu ka baqo in dadka waxyeello soo gaarto.
Markii ugu dambeysay ee dhaar lagu qabto gudaha dhisme waxay ahayd 1985, markii Madaxweynaha hore Ronald Reagan loo dhaarinayay muddo xileedkiisii labaad.
Trump ayaa sidoo kale sheegay in khudbaddiisa dhaarta, ducooyinka, iyo hadallada kale lagu qaban doono isla gudaha xaruunta Capitolka, halkaas oo martida iyo mas’uuliyiinta lagu soo ururin doono gudaha.
Madaxweynaha la doortay ayaa intaa ku daray in garoonka ciyaaraha ee Capital One Arena ee Washington la furi doono si dadweynuhu ugu daawadaan dhaarta gudaha iyo sidoo kale in halkaas lagu qabto dabaaldegyada.
Trump ayaa sheegay inuu dadka ku biiri doono halkaas kadib marka uu dhaarta maro oo lagu wado inay dhacdo 12 duhurnimo.
Si kastaba ha ahaatee, weli lama oga waxa laga yeeli doono in ka badan 250,000 oo qof oo la filayay inay isugu yimaadaan fagaaraha National Mall si ay uga qayb galaan xafladda bannaanka.
Garoonka Capital One Arena ayaa qaada 20,000 oo qof oo kaliya.
