Milatariga Israel ayaa Talaadada maanta ah sheegay inay dhowr jeer isku dayeen inay soo ridaan gantaal laga soo riday Yemen kaasi oo dhawaqa digniinta ka yeeray bartamaha dalka.
Weerarkan ugu dambeeyay ayaa yimid wax ka yar maalin ka dib markii Xuutiyiinta Yemen ay sheegeen inay gantaal ku rideen Tel Aviv, kaasi oo ciidamada Israel ay sheegeen inay dhex ka qabteen.
“Ka dib markii digniinta lagu dhawaaqay meelo badan oo ku yaalla bartamaha Israel, waxaa la sameeyay dhowr isku day oo lagu qabanayo gantaal laga soo riday Yemen,” ayuu militarigu ku yiri bayaan uu soo saaray abaare 3:30 subaxnimo (0130 GMT).
“Gantaalka waxay u badan tahay in la qabtay,” ayuu yiri, isagoo intaa ku daray in aan la soo sheegin wax dhaawac ah ama burbur ah.
Xuutiyiinta Yemen ayaa xaqiijiyay weerarkii subaxii Talaadada, iyagoo sheegay inay rideen “gantaal xawaare sare leh” oo ku socda “magaalada Jaffa ee la haysto”, taasi oo ula jeedaan xarunta ganacsiga Israel ee Tel Aviv.
Gantaal ridista ayaa timid ka dib weerarkii habeenka Isniinta kaasi oo la sheegay in lagu qabtay gantaal kale oo laga soo riday Yemen “ka hor inta uusan soo gelin dhulka Israel”, sida uu sheegay militariga.
Xuutiyiinta ayaa sidoo kale sheegay inay rideen afar diyaaradood oo aan duuliye lahayn oo ku socda isla gobolkaas.
Waxay ballan qaadeen inay sii wadi doonaan howlgalladooda ilaa “inta laga joojinayo gardarrada loo geysanayo Falastiiniyiinta”.
Tan iyo markii uu dagaalka Gaza billaawday October 2023, Xuutiyiinta ayaa si isdaba joog ah gantaallo iyo diyaarado aan duuliye lahayn ugu ridayey Israel taasi oo ay ku sheegeen inay tahay midnimo ay u muujinayaan Falastiiniyiinta.
Kooxda Xuutiyiinta ayaa gacanta ku haysa qaybo ka mid ah Yemen, Israel-na waxay dhowr jeer duqeysay bartilmaameedyada Xuutiyiinta ee gudaha dalka oo ay ku jirto caasimadda Sanca.
Xafiiska Shabakada Allbanaadir.com
Muqdisho Somalia
Allbanaadir@live.com
