Guddoomiyaha Guddiga Madaxabanaan ee Doorashooyinka Qaranka, Mudane Cabdikariin Axmed Xassan, ayaa sheegay in jadwalka doorashooyinka qaranka ay soo shaacin doonaan toddobaad gudihiis.
C/kariim Axmed Xasan oo ay weheliyaan xubno ka mid ah Guddiga ayaa hadalkan ka sheegay shir jaraa’id oo uu ku qabtay xarunta Guddiga ee magaalada Muqdisho.
Mudane Cabdikariin, oo warbaahinta la hadlay, ayaa sheegay in guddiga doorashooyinka ay booqan doonaan goobaha loo qorsheeyay qabashada doorashada qof iyo codka ah.
“Waxaan shacabiga Soomaaliyeed uga bishaareyneynaa in guddigan uu diyaar u yahay in aanu idinka soo gaarsiino Sanduuqa Doorashada, meel walba oo aad joogtaan,” ayuu yiri Guddoomiyaha.
Guddiga ayaa ka warbixiyay qorshaha istratijiyadda ee ay ku wajahayaan tiirarka muhiimka ah doorashooyinka iyo howlaha hortabinta u leh. Guddoomiyaha ayaa carrabka ku adkeeyey in Guddigu meel Wanaagsan ka gaaray diyaarinta xeerarka aasaaska u ah doorashada, dhisidda hay’adda Guddiga doorashooyinka xarunta iyo xafiisyada dawlad goboleedyadabada.
Howlaha kale ee Guddigu diyaarintooda mudnaanta siiyay waxaa ka mid ah diiwaangelinta ururrada siyaasadda, wacyigelinta codbixiyaha iyo teknolojiyadda fududaynta howlaha doorashada.
Ugu danbeyntii Guddoomiyaha ayaa u ballan qaaday ummadda Soomaaliyeed in ay dhowaan shaacin doonaan qorshaha waqtiyaysan ee doorashada qaybaha uhu horreeya rubuca koowaad ee Sannadkan. Wuxuuna sheegay in ay kala fariisan doonaan dhamaan saamilaydsa siyaasadda u yihiinna dhexdhexaad albaabka guddiguna u furan yahay dhammaan.
Sidoo kale, Mudane Cabdikariin ayaa ballan qaaday in guddiga ay ka shaqeyn doonaan doorasho hufan oo xalaal ah, isagoo codsaday in bulshada Soomaaliyeed, qeybaha kala duwan, ay ka gacan siiyaan hanaanka doorashada.
