Dawladda Suuriya ayaa xirtay xadka Lubnaan, iyadoo sidoo kale la joojiyay dal ku galkii bilaashka ahaa ee muwaadiniinta Lubnaan ay ku gali jireen Suuriya, kuwaasoo looga baahanayo wixii ka dambeeyay Jimcihii shalay inay soo qaataan fiisaha dal ku galka ka hor inta aysan soo galin Suuriya
Talaabadan ayaa timid kaddib markii isku horimaad hubaysan uu shalay ka dhacay xadka, halkaasoo la sheegay inay dhaqdhaqaaqyo ka wadeen ciidanka Lubnaan, sida ay ku warrantay wakaaladda warar ee AFP.
Lubnaan ayaa sheegtay ugu yaraan 4 askari in looga dhaawacay inta ay socotay is rasaaseyn dhexmartay ciidanka xadka ee labada dal, go’aanka lagu joojiyay dal ku galka ayaanna soo bandhigaya khilaafka ugu horreeyay ee diblomaasiyadeed ee labada dal.
Dhinaca kale Wakaaladda wararka ee Reuters, ayaa ku warrantay wasiirka arrimaha dibadda Suuriya, Asaad Hassan al-Shaibani inuu toddobaadkan booqasho rasmi ah ku tagi doono dalalka Qatar, Imaaraadka Carabta iyo Jordan , halkaasoo uu wada-hadallo kula yeelanayo wasiirrada arrimaha dibadda ee saddexda dal.
Wasiirrada arrimaha dibadda ee Faransiiska, Jean-Noël Barrot iyo Jarmalka, Annalena Baerbock ayaa iyana shalay gaaray magaalada Dimishiq ee caasimadda Suuriya, halkaasoo ay wada-hadallo kula yeelanayaan hoggaanka sare ee dawladda Suuriya.
