Wafdi heer sare ah oo ka socda dowladda Itoobiya oo ay hoggaaminayso Wasiirka Gaashaandhigga, Aisha Mohammed ayaa booqasho shaqo oo rasmi ah ku tagay Soomaaliya.
Wafdiga ayaa intii ay ku guda jireen booqashada waxa ay wadahadallo miro dhal ah la yeesheen Madaxweynaha Soomaaliya Xasan Sheekh Maxamuud, wuxuuna gudoomay dhambaal ka yimid Ra’iisul Wasaare Dr. Abiy Axmed sida ay sheegtay Wasaarada arrimaha dibeda ee Itoobkiya
Wadahadallada ayaa dib loo xaqiijiyay sida ay uga go’an tahay labada dal inay ka wada shaqeeyaan xaqiijinta nabadda iyo xasilloonida Soomaaliya iyo gobolka.
“Labada dal waxay ku heshiiyeen inay iska kaashadaan howlgalka AUSSOM iyo xoojinta xiriirka labada dal. Waxa kale oo ay isku afgarteen in kor loo qaado booqashooyinka iyo wada-hadallada la is waydaarsanayo, iyadoo la filayo in madaxda sare ee Soomaaliya ay dhawaan tagaan Addis Ababa” ayaa lagu yiri warka ay soo saartay Itoobiya
Wasiirka Gaashaandhigga Soomaaliya, Cabdulqaadir Maxamed Nuur Jaamac, ayaa muujiyay sida uu uga mahadcelinayo naf-hurnimada ciidamada Difaaca Itoobiya iyo ka qayb qaadashada xaqiijinta nabadda Soomaaliya.
Hadalkeeda, Wasiirka Gaashaandhigga, Itoobiya Injineer Caasha Maxamed, ayaa ku nuuxnuuxsatay sida ay Itoobiya uga go’an tahay ka qayb qaadashada nabadda iyo xasilloonida Soomaaliya.
Waxa ay sidoo kale carabka ku dhufatay in la dagaalanka argigixisada ay tahay qeybta ugu muhiimsan ee iskaashiga labada dal.
Wasiiru dowlaha Arrimaha Dibadda Itoobiya Danjire Mesganu Arga, ayaa ku nuux-nuuxsaday muhiimadda ay wadaagaan labada dal ee Itoobiya iyo Soomaaliya, wuxuuna hoosta ka xariiqay muhiimadda ay leedahay in colaaduhu aysan caqabad ku noqon qorshayaasha horumarineed ee labada dal.
Danjire Mesganu oo hadalkiisa sii wata ayaa hoosta ka xariiqay in loo baahan yahay in si deg deg ah wax looga qabto caqabadaha dhanka ammaanka, islamarkaana diiradda la saaro horumarinta iyadoo sare loo qaadayo iskaashiga labada dal.
Weli ma jiro war ka soo baxay dowlada Somalia oo la xiriira kulamadii ay la qaateen wafdiga Itoobiya iyo waxyaanihii ka soo baxay
HOOS KA DAAWO SAWIRADA
