Waxaa maanta magaalada Baladweyne ee xarunta gobolka Hiiraan, la geeyay meydadka todobo askari oo katirsanaa ciidanka xoogga dalka oo shalay si arxan darro ah loogu laayay deegaanno hoostaga degmada Ceelbaraf ee gobolka Shabeelaha Dhaxe.
Askartan ayaa shalay la dilay xilli ay kasoo fasax qaateen xeradii ay katirsanaayeen oo kutaalla deegaanka Xawadley ee gobolka Shabeelaha Dhaxe, waxa ayna ciidankan kusii jeedeen gobolka Hiiraan oo deegaan ahaan kasoo jeedeen.
Odayaasha dhaqanka beesha Xawaadle oo maanta warbaahinta kula hadlay degmada Maxaas ee gobolka Hiiraan, ayaa si kulul u cambaareeyay falkii lagu dilay askarta kasoo jeeda beesha Xawaadle, waxa ayna dowladda ka dalbadeen in si deg deg loo soo qabto dadkii falkaasi ka dambeeyay.
Waxa ayna odayaasha qaarkood oo si kulul u hadlay ayaa muddo 24-saac ah u qabtay dowladda Soomaaliya in ay kusoo qabato raggii dilka geestay, haddii kale ay isugu imaan doonaan kulamo wadatasho ah ayna qaadi doonaan tallaabootin deg deg ah.
Dowladda Soomaaliya ayaan wali si rasmi ah uga hadlin askarta aanada qabiil loo laayay, waxaana weerarkan cambaareeyay Madaxweynaha Hirshabelle Cali Guudlaawe , oo amar ku bixiyay in si deg deg ah loo soo qabto dadkii dilka askarta ka fuliyay.
