Saraakiil iyo ciidamo katirsan Booliiska oo tababar loo soo xiray (Sawirro)

Taliyaha ciidanka Booliiska Soomaaliyeed Sarreeye Guuto Asad Cismaan Cabdullaahi oo uu wehliyo Taliye ku xigeenka Ciidanka Booliiska Sarreeye , ayaa xarunta akadeemiyada ee Generaal Kaahiye tababar ugu soo xiray ciidamo katirsan booliiska oo isugu jira saraakiil iyo ciidamo ka kala tirsan daraawiishta iyo kuwa sida gaarka ah u tababaran ee Haramcad.

Saraakiisha tababarka loo xiray ayaa la baray hoggaaminta wannaagsan ee ciidanka oo isbadal weyn lagu sameeyey ,halka ciidamada Haramcad iyo daraawiishta iyagana lagu tababaray ku dhaqanka anshaxa iyo xeerarka u degsan ciidanka, iyagoo Ilaalinaya badqabka muwaadiniinta Soomaaliyeed kana hortagaya falalka guracan ee kooxaha Al Shabaab ay geystaan.

Sarreeye Guuto Asad Cismaan Cabdullaai taliyaha ciidanka booliiska oo hadal u jeediyey Ciidamada iyo saraakiisha fursadda u helay tababarka, ayaa sheegay in aqoonta casriyeysan ee lagu tababaray laga doonayo in shaqadooda laga arko lagulana xisaabtamayo , waxaana uu kula dardaarmay in shacabka xiliyada ay shaqada ku jiraan ula dhaqmaan si wannaagsan oo anshaxa ciidanka waafaqsan .

Munaasabad kooban oo ka qabsoontay gudaha xarunta akadeemiyada booliiska Soomaaliyeed ee Generaal Kaahiye ayuu taliyuhu shahaado sharaf caddeynaysa aqoonta la baray ciidamadan uu tababarka u xiray guddoonsiiyey .