Guddoomiyihii hore ee maamulka gobolka Banaadir, ahaana duqii magaalada Muqdisho Mudane Xasan Maxamed Xuseen (Muungaab), ayaa qoraal uu soo saaray kaga hadlay mashruuca lagu dhisayo garoon diyaaradeed iyo dekad cusub oo ay yeelato Muqdisho.
Muungaab ayaa sheegay in mashruucan lagu dhisayo Muqdisha cusub ay ku hoos duugan tahay in dhac loo geesto dhul ay dad shacab leeyihiin oo kuyaalla intau dhaxeysa deegaanka Ceel Macaan iyo degmada Warsheekh ee gobolka Shabeelaha Dhaxe.
Waxa uu sheegay Muungaab in qorshahan uu u arko boob iyo barakicin dadka deegaankaasi ku nool, , isaga oo tilmaamay in ujeedka uusan aheyn mashruuc garoon oo ay ku filan tahay (5 Km oo dherer ah iyo 2.5 Km ballac ah, mana aha Dekad u baahan 7 KM oo dherer xeebta ah iyo 2.5 KM oo ballac ah).
Halkan ka akhriso qoraal uu arrintan kasoo saaray Muungaab.
Mashruurca Dekadda & Garoonka cusub (New Mogadishu Development Corporation)
In dadka degaanka talo iyo tixgelin kadib danguud ahaan looga qaado dhul la doonayo in laga hirgeliyo mashruuc Garoon iyo Dekad oo ay yeelato Muqdisho,isla markaana dadka deegaanka laga siiyo Mashruuca ugu yaraan 35% waa wax macquul ah caalamkana kajira.
Waxaase curato diimoon iyo yaab ah in aan helayno xog ah in la doonayo in magaca Danguud lagula wareego dhul xeebeedka u dhexeeya deegaanka Ceelmacaan ilaa Degmada Warsheekh ee Gobolka Sh/Dhexe oo gaaraya (30 KM oo dherer ah iyo 10KM oo ballac ah).
Arintaan waxaan u arkaa Boob iyo barakicin dadka deegaankaasi ku nool, ujeedkuna ma aha mashruuc Garoon oo ay ku filan tahay (5 Km oo dherer ah iyo 2.5 Km ballac ah, mana aha Dekad u baahan 7 KM oo dherer xeebta ah iyo 2.5 KM oo ballac ah).
Waxaan ka digayaa in barakicinta iyo dhul boobka ka socda Xamar loo raro Degmada Warsheekh.
Dadka deegaanka waa inay baraarugaan, fadhigana ka kacaan dal iyo dibad inta ay goori goor tahay.
Xafiiska Shabakada Allbanaadir.com
Muqdisho Somalia
Allbanaadir@live.com
