Xuutiyiintadalka Yemen ayaa maanta waxay la bartilmaansadeen aag ku yaal Tel Aviv gantaal ballistic ah oo ah nooca “Falastiin 2”
Afhayeenka milateriga kooxda Yahya Sarec ayaa hadal uu ka jeediyay telefishinka ku sheegay in guutada gantaallada ee kooxda ay ku guulaysteen inay beegsadeen xarun ay leeyihiin ciidamada Israa’iil, taasoo ah isku day kale oo ay ku doonayeen inay ku qaadaan weerar ka dhan ah Israa’iil.
Sarec waxa uu intaa ku daray, sida ay ku warantay wakaaladda wararka ee Reuters, in gantaalku “si sax ah uu ugu dhacay bartilmaameedkiisa, difaaca Israelna ay ku guul-darreysteen inay ka hortagaan.
Ku dhawaaqista ayaa ku soo beegantay laba maalmood ka dib markii Israa’iil ay duqaymo ka geysatay dekedaha Xuutiyiinta iyo kaabayaasha tamarta ee Yemen, oo in ka badan 1,500 kilomitir koonfurta ka xigta Israa’iil, waxaana ku dhintay sagaal qof, sida ay sheegeen Xuutiyiinta.
Dhankooda, ciidamada Israel ayaa ku dhawaaqay inay ku guuldareysteen inay ka hortagaan gantaal ka yimid Yemen subaxnimadii Sabtida kaasoo ku dhacay aagga Tel Aviv-Jaffa.
Waaxda adeegga ambalaasta ayaa sheegtay in 16 qof ay dhaawacyo fudud soo gaareen, islamarkana uu jiro burbur hantiyeed.
Weerarkan Xuutiyiinta ay ku qaadeen bartilmaameedka militariga ayaa ah kii labaad oo noociisa ah maalmo gudahood, inkastoo maalmo ka hor uu digniin u diray Ra’iisul wasaaraha Israa’iil Benjamin Netanyahu oo u sheegay Xuutiyiinta in ciddii weerarta Israa’iil ay ku bixin doonto qiimo culus.
