Golaha Wasiirrada Xukuumadda Jamhuuriyadda Federaalka Soomaaliya ayaa caawa yeeshay kulan gaar ah, oo uu guddoominayey Ra’iisul Wasaare ku-xigeenka dalka, Mudane Saalax Axmed Jaamac
Waxaa kulana lagu soo bandhigay qaar ka mid ah qodobbada Dastuurka ee dib-u-eegista lagu sameynayo iyo kuwii horey loogu sameeyey.
Guddiga madaxa bannaan ee dib-u-eegista iyo hirgelinta dastuurka iyo guddiga arrimaha Dastuurka u qaabilsan Baarlamaanka, ayaa golaha warbixin ka siiyey halka ay marayaan wadatashiyada ku aaddan dib-u-eegista dastuurka, gaar ahaan qodobbada 5-aad iyo 9-aad oo la bilaabay wadatashiyadooda, iyada oo goluhu su’aallo ka weydiiyey, isla markaana aragtidooda ku biiriyey cutubyada la soo bandhigay ee dib-u-eegista lagu sameynayo.
Ra’iisul Wasaare ku Xigeenka Xukuumadda Jamhuuriyadda Federaalka Soomaaliya Mudane Saalax Axmed Jaamac, oo kormeer shaqo ku tagey Wasaaradda Isgaarsiinta iyo Teknoolojiyadda, ayaa u kuur-galay habsami u socodka shaqada ay Wasaaraddu u hayso bulshada.
Waxa uu warbixin ka dhagaystay Wasiirka Wasaaradda iyo Agaasimeyaasha, oo uga warramay sida ay u socdaan sbaqooyinka kala duwan iyo hey’addaha madaxa bannaan ee wasaaradda hoos yimaada.
Ra’iisul Wasaare ku Xigeenka, ayaa bogaadiyey habsami u socodka adeegyada ay wasaaraddu bixiso iyo shaqooyinka baaxadda leh ee ka socda, wuxuunna kula dardaarmay in loo diyaar garoobo sidii loo hirgalin lahaa himillooyinka waaweyn ee la qorsheynayo in dalkeennu ku tallaabsado sanadka soo socda oo ay kamid tahay hirgalinta Qorshaha isbeddelka Qaranka.
