Somaliland ayaa markii ugu horreysay ka hadashay heshiiskii ay Ankara ku gaareen madaxweynaha Soomaaliya iyo Raysal wasaaraha Itoobiya, kaasoo sida muuqata meesha ka saaray heshiiskii Muuse Biixi uiyi abiy ahmed
Afhayeenka Xisbiga Waddani Maxamed Faarax Cabdi ayaa ka hadlay aragtida Xisbigooda ee ku aadan heshiiskii Ankara ku dhex maray Madaxweynaha Dawladda Federaalka ee Somalia iyo Raysal Wasaaraha Itoobiya.
Iyadoo ay xukuumaddu cusubtahay isla markaana la caleema saaray maalin uun kadib markii uu dhacay heshiiskii Ankara, hadanna Somaliland waxa ay ka hadashay waxa uga qorsheysan heshiiskaasi iyo si guud isfahamkii ay horay ugu heshiiyeen Somaliland iyo Itoobiya.
“Heshiiska ka dhacay Ankara waxba inagama khuseeyaan, waa labo dal anagnuna waxan nahay Somaliland, haddii ay heshiinayaan waa labo dal oo walaalo ah, in ay is raacaan oo heshiiyaan oo sheekeystaan waa iska caadi waxba nagama khuseeyaan”, ayuu yiri Afhayeenka Xisbiga Waddani Maxamed Faraax Cabdi.
Dhinaca kale waxa uu ka hadlay mowqifka ay xukuumaddu ka leedahay heshiiskii is-faham ee ay horay uwada galeen Somaliland iyo Itoobiya.
“MOU-ga Itoobiya anagu ma aynaan arag oo xukuumaddu hadda ayey talada la wareegtay, wan arki doonnaa, marka la arko ee la derso haddii ay danta Somaliland kujirto waa laga shaqeyn doonaa, haddii aysan danteenna kujirinna laga shaqeyn mayo, marka waxaynu sugi doonnaa in aynu aragno kaddib ayaan go’aan laga gaari doonaa”, ayuu yiri.
Xisbiga haya talada Somaliland ee Waddani, ayaa sidoo kale ka hadlay waxyaabaha mudnaanta u ah ee ay qabanayaan 100-ka maalmood ee u horreyya muddo xilkeedkooda iyo sida ay u kala horeysiinayaan qorshahooda waxqabad.
Afhayeenka Xisbiga Waddani Maxamed Faraax Cabdi, ayaa sheegay in waxyaabaha ay mudnaanta siinayaan ay mid tahay nabadeynta Gobollada bariga, Caafimaadka iyo dhismaha Waddooyinka.
