Madaxweyne Joe Biden ayaa u adeegsaday booqashadii ugu horeysay ee madaxweyne Mareykan ah oo uu ku tagay Angola si uu u dhiirigeliyo balaayiin doolar oo ballanqaadyo ah oo loogu talagalay dalalka ka hooseeya saxaraha Afrika.
“Maraykanku waxa uu ku sugan yahay Afrika,” ayuu Biden u sheegay madaxweynaha Angola João Lourenço, oo booqashadii Biden ku tilmaamay mid muhiim u ah xiriirka Maraykanka iyo Angola ee soo taxnaa tan iyo dagaalkii qaboobaa.
Safarkan oo loogu talagalay in lagaga hortago saamaynta Shiinaha ee qaaradda Afrika oo ay ku nool yihiin in ka badan 1.4 bilyan oo qof ayaa la soo bandhigay ballanqaadka Maraykanka oo gaaraya $ 3 bilyan oo dib loogu dhisayo waddada tareenka ee Lobito Corridor ee isku xira Zambia, Kongo iyo Angola.
Talaabadan waxaa loola jeedaa in la fududeeyo dhaqaajinta alaabta ceeriin ee dhoofinta iyo horumarinta joogitaanka Maraykanka ee gobolka qaniga ku ah macdanta muhiimka ah ee loo isticmaalo baytariyada baabuurta korontada, qalabka elektarooniga ah iyo tiknoolajiyada tamarta nadiifka ah.
Shiinuhu waxa uu hore u lahaa maal-gashi badan oo dhinaca macdanta iyo farsamaynta macdanta Afrika, waxana uu ku dhawaaqay inuu mamnuucayo dhoofinta Maraykanka ee gallium, germanium, antimony iyo agabka kale ee tignoolajiyada sare. Waxay timid maalin kadib markii Maraykanku uu balaariyay liiska shirkadaha teknolojiyadda Shiinaha ee ku xiran kontaroolada.
Biden wuxuu booqan doonaa magaalada xeebta ku taal ee Lobito Arbacada si uu u eego marinka badweynta Atlantic. Mashruucu waxa kale oo uu maalgelin ka helay Midowga Yurub, Kooxda Toddobada Waddan ee hormuudka ka ah Warshadaynta, Daladda Gaarka ah ee ay Hoggaaminayaan Reer Galbeedka iyo Bangiyada Afrika.
Afhayeenka amniga qaranka ee Aqalka Cad John Kirby ayaa sheegay in dhamaystirka wadadu ay “qaadan doonto sanado.” Taasi waxay la macno tahay in in badan oo ka mid ah laga yaabo inay ku dhacdo Donald Trump, oo xafiiska la wareegaya Janaayo 20.
