Ciidanka xoogga dalka Soomaaliyeed, gaar ahaan ururada 175-aad, guutada 17-aad ee Gorgor iyo 146-aad ee guutada 14-ka October, ayaa howlgal qorsheysan oo ka dhan ah kooxda Al Shabaab ka fuliyay duleedka deegaanka Owdheegle ee gobolka Shabeelaha Hoose.
Howlgalkan ciidanka xoogga dalka fuliyeen oo ahaa mid gaadmo ah ayaa lagu beegsaday dagaallamayaal katirsanaa kooxda Al Shabaab , kuwaa oo la sheegay in shacabka ku dhibayeen tuulooyin hoostaga deegaanka Awdheegle .
Taliyaha Guutada 14-ka October ee ciidanka dhulka xoogga dalka Soomaaliyeed G/sare Nuur Maxamed Gaabow (Nur Farey), ayaa warbaahinta u sheegay in howlgalka ciidanka fuliyeen ku dileen xubno katirsan Al Shabaab , kuwaa uu sheegay in shacabka baad ka qaadayeen.
Waxa uuna taliyaha intaa ku daray in ciidamada ku guuleesteen in ay ka eryaan goobihii ay tageen xubnihii katirsanaa Al Shabaab, waxa uuna xusay in howlgalka ciidanka fuliyeen uu kusoo dhammaaday guul ayna jab gaarsiiyeen Al Shabaab.
Ciidanka xoogag dalka Soomaaliya ee ku sugan deegaanno iyo degmooyin katirsan gobolka Shabeelaha Hoose, ayaa mararka qaar fuliya howlgallo ka dhan ah kooxda Al Shabaab , kuwaa oo ku sugan inta badan tuulooyinka gobolkaasi katirsan.
Xafiiska Shabakada Allbanaadir.com
Muqdisho Somalia
Allbanaadir@live.com
