Guddoomiyaha Golaha Wakiillada Dr. Maxamed Nur Gacal ayaa Shir Guddoomiyey kulanka maanta ee Golaha oo ka dhacay magaalada Dhuusamareeb.
Ajendaha kulanka ayaa Doorashada Xubin Aqalka Sare ee Jamhuuriyadda Federaalka Somalia oo laga soo doorto Galmudug kaasoo buuxinaya kursi ka banaanaa golaha
Shirka Golaha ee maanta ayey ku doorteen Goluhu Kursiga tirsigiisu yahay UH16 ee Aqalka Sare.
Waxay Senator ugu doorteen cod Aqlabiyad Gacan-taag ah Mudane Cabdi-wali Ibraahim Garyare oo ka soo jeeda degmada Caabudwaaq Kadib markii uu Tanaasulay Musharraxii la tartamaysey Saciida Maxamed Cilmi.
Guddoomiyaha iyo Xubnaha Golaha ayaa Hambalyo iyo Duco u diray Senatorka cusub in uu Alle la garab-galo Xilka Culus ee loo dhhibay.
“Waxaa marka hore u mahadcelinayaa Madaxweynaha dowlada Galmudug Mudug Ahmed Qoorqoor, oo runtii fursad ii siiyey in aan u tartamo xil qaran oo aan ugu adeegayo guud ahaan ummadda Soomaaliyeed, gaar ahaana reer Galmudug” ayuu yiri Cabdiweli Ibrahim Ganyare oo kulankaas ka hadlay.
Senator Garyare ayaa sidoo kale yiri
“Madaxweyne Qoorqoor oo ah hoggaamiye isbadel badan ku sameeyey kaabayaasha dhaqaale, ammaan, waxbarasho, caafimaad ayaa sidoo kale astaan u leh isku wadka shacabka Galmudug ee kala aragtida duwan, taasi oo ay yar tahay hoggaamiye awooda. waxaan u balan-qaadayaa inaan garab iyo gaashaan u noqdo markasta”
“Dhinaca kale, Guddoomiyaha baarlamaanka iyo xildhibaanada sharafta leh ayaa jecelahay inaa u mahadceliyo, maadaama ay codka kalsoonida isiiyeen, weliba si ay ku jirto xushmad iyo dhiirigelin siyaasadeed. Waxaana ballanqaadayaa in aanan meel cidlo ah uga tegin. Insha’allaah”
HOOS KA DAAWO SAWIRADA
