Donald Trump ayaa lagu wadaa inuu dib ugu laabto Aqalka Cad isagoo ballan qaaday inuu tallaabo ka qaadi doono arrimaha ay ka midka yihiin, socdaalka, dhaqaalaha iyo dagaalka Ukraine.
Waxa uu u muuqdaa inuu taageero badan ku heli doono ajandihiisa Congress-ka ka dib markii xisbigiisa Jamhuurigu uu dib u soo ceshaday xukunka Senatka.
Khudbadiisii guusha, Trump waxa uu wacad ku maray in uu “ku maamuli doono hal-ku-dheg fudud: oo gun dhig ah ballan-qaadyadii la sameeyay. Waanu ilaalin doonna ballamahayada.”
Laakiin xaaladaha qaar, wuxuu bixiyaa faah-faahin yar oo ku saabsan sida uu u gaari karo himiladiisa.
Mar 2023 ay Fox News waydiisay in uu ku takri fali doono awoodiisa ama uu bartilmaameedsan doono dadka ka siyaasad ahaan ka soo horjeedo, waxa uu ku jawaabay maya, “marka laga reebo maalinta koobaad”.
“Maya, maya, maya, marka laga soo tago maalintaas, waxaanu xiraynaa xuduudka, waanu qodaynaa, qodaynaa, qodaynaa, intaa ka dib, anigu ma ihi kali-talis.”
1) In la tarxiilo dadka muhaajiriinta aan sharciga haysan
Intii uu ololaha ku jiray, Trump waxa uu ballan qaaday masaafurinta dad tiro badan oo ah dadka aan sharciga lahayn ee taariikhda Maraykanka.
Waxa kale oo uu ballan qaaday in uu dhamaystiri doono darbiga laga dhisayo xuduudka Mexico oo la bilaabay xilligii uu madaxweynaha ahaa ee u horeeysay.
Tirada irridaha laga soo gudbo xadka koonfureed ee Mareykanka ayaa gaaray heerarkii ugu dambeeyay dhamaadkii sanadkii hore intii lagu guda jiray muddo xileedka maamulka Biden-Harris.
Khubarada ayaa BBC-da u sheegay in masaafurinta baaxadda leh ee uu ballan qaaday Trump ay la kulmi doonto caqabado waaweyn oo dhanka sharciga iyo kharashaadka ah – ayna hoos u dhigi karto kobaca dhaqaalaha.
2) Tallaabooyin la xiriira dhaqaalaha iyo cashuuraha
Xogta ra’yi uruurinta ayaa soo jeedisay dhaqaaluhu inuu ahaa arrin muhiim u ah codbixiyayaasha. Trump ayaa ballan qaaday in uu “meesha ka saari doono sicir-bararka” – kaas oo gaaray heerarkii ugu sarreeyay xilligii madaxweyne Joe Biden ka hor inta uusan mar kale hoos u dhicin. Laakin awooda madaxweynaha uu si toos ah u saameynayo qiimaha ayaa xadidan.
Waxa kale oo uu ballan qaaday in uu cashuur dhimis xad-dhaaf ah samayn doono, isaga oo kordhinaya dib-u-habeyntiisa iyadoo laga bilaabayo 2017. Waxa uu soo jeediyay in la sameeyo talooyinka cashuur-la’aanta iyo baabiinta cashuuraha lacagaha badbaadada bulshada.
Waxa uu soo jeediyay canshuuro cusub oo ah ugu yaraan 10% inta badan badeecadaha shisheeye, si loo yareeyo hoos u dhaca ganacsiga. Badeecadaha ka yimaada Shiinaha waxay la kulmi karaan 60% canshuur dheeri ah, ayuu yiri. Dhaqaale-yahannada qaarkood ayaa ka digay in tillaabooyinkan oo kale ay sare u qaadi karaan qiimaha nolosha dadka caadiga ah.
3) laalidda xeerarka cimilada
Intii lagu jiray xilligii madaxweynanimadiisii ugu horreysay, Trump wuxuu meesha ka saaray boqolaal ilaalin deegaanka ah wuxuuna Mareykanka ka dhigay waddankii ugu horreeyay ee ka baxa heshiiskii cimilada ee Paris.
Markan, waxa uu mar kale wacad ku maray in uu jari doono xeerarka, gaar ahaan si uu u caawiyo warshadaha baabuurta Maraykanka. Wuxuu si joogto ah u weeraray baabuurta korontada ku shaqeysa, isagoo ballan qaaday inuu meesha ka saari doono hiigsiyadii Biden kuna dhiirigelinaya u beddelashada baabuurta nadiifka ah.
Waxa uu ballan qaaday in uu kordhin doono wax soo saarka shidaalka Maraykanka – isaga oo wacad ku maray in uu “qodi doono ceelal shidaal ah” maalinta koowaad isaga oo door bidaya ilaha tamarta la cusboonaysiin karo sida tamarta dabaysha.
Waxa uu doonayaa in uu u furo meelo ay ka mid yihiin meelaha cidlada ee Arctic-ga oo laga qodo saliidda, taas oo uu ku doodayo in ay hoos u dhigi doonto kharashka tamarta – inkastoo falanqeeyayaasha ay shaki ka qabaan.
4) Joojinta dagaalka Ukraine
Trump ayaa dhaleeceeyay tobanaan balaayiin doollar oo Maraykanku ku taageerayo Ukraine dagaalka uu kula jiro Ruushka – wuxuuna ballan qaaday in uu colaadda ku soo afjarayo “24 saacadood gudahood” iyadoo loo marayo heshiis wada hadal ah.
Ma uusan sheegin waxa ay tahay in labada dhinac ay ka tanaasulaan. Dimuqraadiyiinta ayaa sheegay in tallabadaasi ay dhiiri galin doonto madaxweyne Vladimir Putin.
Trump wuxuu rabaa in Mareykanka uu iska fogeeyo isku dhacyada shisheeye guud ahaan. Marka laga hadlayo dagaalka Gaza -Trump wuxuu sheegay inuu yahay taageere si weyn u taageersan Israa’iil, laakiin wuxuu ku booriyay xulafada Mareykanka inay joojiyaan howlgalkooda.
Waxa uu sidoo kale ballan qaaday in la soo afjari doono rabshadaha la xiriira Lubnaan, laakiin ma uusan bixin faahfaahin ku saabsan sida loo joojinayo.
5) In aanu mamnuucin ilmo iska soo xaaqidda
Isagoo ka soo horjeeda rabitaanka qaar ka mid ah taageerayaashiisa, Trump wuxuu sheegay intii ay socotay doodii madaxweynenimada ee Kamala Harris inuusan saxiixi doonin sharciga mamnuucida ilmo iska soo rididda qaranka.
Sannadkii 2022, xuquuqdii dastuuriga ahayd ee waddanka oo dhan ee ilmo iska soo xaaqid ayaa waxaa laashay maxkamadda sare, taasoo lahayd inta badan garsoorayaasha muxaafidka ah ka dib madaxwaynihii ugu horreeyay ee Trump.
Xuquuqda taranka waxay noqotay mawduuc muhiim ah oo ololaha Harris, iyadoo dhawr gobol ay ansixiyeen tallaabooyin lagu ilaalinayo ama lagu ballaarinayo xuquuqda ilmo soo rididda maalinta codbixinta.
Trump laftiisu wuxuu si joogto ah u sheegayay in dawlad goboleedyadu xor u ahaadaan inay go’aan ka gaaraan sharciyadooda ku saabsan ilmo iska soo rididda, laakiin waxay ku dhibtoonayeen inay helaan farriin joogta ah oo isaga u gaar ah.
6) Cafinta qaar ka mid ah dadkii loo xirayrabshado 6-dii Janaayo
Trump ayaa sheegay in uu “xoreyn doono” qaar ka mid ah kuwa lagu helay dambiyada intii lagu jiray rabshadihii ka dhacay Washington DC 6dii Janaayo 2021, markaasoo taageerayaashiisa ay weerareen dhismaha Capitol si ay u fashiliyaan doorashadii 2020 ee Joe Biden.
Dhowr dhimasho ayaa lagu eedeeyay rabshadaha, oo Trump lagu eedeeyay inuu kicinayo.
Waxa uu sheegay inuu ka shaqeeynayo in uu hoos u dhigo rabshada iyo dib u soo celinta boqolaalka taageere ee lagu xukumay in ay yihiin maxaabiis siyaasadeed.
Wuxuu sii wadaa inuu sheego in qaar badan oo iyaga ka mid ah ay “si qaldan u xiran yihiin”, inkastoo uu qiray in “labo ka mid ah, laga yaabo inay ka baxeen xeyndaabka”.
7) Eryidda Lataliyaha Gaarka ah ee Jack Smith
Trump ayaa wacad ku maray in uu “laba ilbiriqsi gudahood” ku eryi doono marka uu xafiiska la wareego dacwad oogaha ruug-caddaaga ah ee hogaaminayay laba dambi baaris oo isaga ka dhan ahaa.
La-taliyaha gaarka ah Jack Smith ayaa Trump ku soo oogay dadaallada lagu doonayo in lagu afgambiyo doorashada 2020-ka, iyo in uu si khaldan u maamulay dukumentiyo sir ah.
Trump wuu diiday inuu wax khalad ah sameeyay, wuxuuna ku guuleystay inuu ka hortago kiis kasta oo la xiriira doorashadii hore. Waxa uu sheegay in Mr Smith uu ku kacay ” ugaarsi siyaasadeed “.
Trump ayaa ku laaban doona Aqalka Cad isagoo ah madaxweynihii ugu horreeyay ee abid lagu xukumo dambi, isagoo New York ay ku heshay dambi ah inuu ka been abuuray diiwaannada ganacsiga.
Source Bbc
