Nin u dhashay dalka Kenyan ayaa lagu helay dambi ah inuu qorsheynayay weerar la mid ah, kii 11-kii Septembar sanadkii 2001-dii lagu qaaday Mareykanka, kaas oo la sheegay inuu ka tirsanaa kooxda al-shabaab.
Xeerbeegti heer federaal ah oo ku sugan magaalada Manhattan oo ka tirsan New York, ayaa Cholo Abdi Abdullah ku helay dhammaan dambiyada lixda ah ee lagu soo oogay, oo ah inuu maleegayay inuu afduubo diyaarad, isla markaana uu u adeegsado weerar dhisme, sida laga soo xigtay rikoorada maxkamadda.
Waxaa lagu wadaa in la xukumo bisha March ee sanadka soo socda, waxana uu wajihi doonaa ugu yaraan 20 sano oo xarig ah.
Dhageysiga dacwadda Cholo Abdullaahi ayaa bilowday todobaadkii la soo dhaafay, isaga ayaa is difaacayay, wuxuuna diiday inuu hadal ka jeediyo furitaankii maxkamadda, sidoo kalena si toos ugama uusan qeyb qaadan su’aalo weydiinta markhaatiyaasha.
Garyaqaanada loo xil saaray inay Cabdulaahi ka caawiyaan is difaaciddiisa, ayaanan ka soo jawaabin farriimo loo diray Isniintii shalay ahayd.
Dacwad oogayaasha heer federaal oo Khamiistii soo afjaray kiiskooda, ayaa sheegay in Cholo Cabdi uu weerarkan qorsheeyay muddo afar sano ah, isagoo soo qaatay tabobar ballaaran oo ku saabsan walxaha qarxa iyo sida loo adeegsado qaab qarsoon loogana badbaadi karo xarig.
Kadib wuxuu u guuray dlka Filibiin 2017-kii halkaas oo uu ka bilaabay tababarka duuliyenimo.
Cabdulaahi Cholo ayaa ku dhowaa inuu dhameysto tabarka duuliyenimo ee labadaa sano socday markii la soo xiray sanadkii 2019-kii.
Sanadkii xigay waxaa loo wareejiyay dalka Mareykanka, gaar ahaanna waxaa lagu wareejiyay mas’uuliyiinta fulinta sharciga Mareykanka, kuwaas oo ku eedeeyay dembiyo la xirriira argagaxisanimo.
Dacwad oogayaasha ayaa sheegay in Abdullah uu sidoo kale baaritaan ku sameeyay sida loo jabsado albaabka diyaaradaha iyo sidoo kale inuu baarayay xogo la xiriira “dabaqa ugu dheer Mareykanka kuna yaala magaalada ugu weyn ee dalkaas” ka hor inta aan gacanta lagu soo dhigin.
Waaxda arrimaha dibadda ee Mareykanka ayaa sannadkii 2008-dii al-shabaab u aqoonsatay urur argagixiso
Xafiiska Shabakada Allbanaadir.com
Muqdisho Somalia
Allbanaadir@live.com
