Ciidamo ka kala tirsan Maamulada SSC iyo Somaliland ayaa saaka ku dagaalamay degaanka Shangeed oo ka tirsan gobolka Ceyn.
Dagaalka oo geystay khasaare aan la ogeyn illaa hadda ayaa bilowday markii ay fooda is dareen ciidamo sahan ah oo ka tirsan kuwa Somaliland iyo ciidanka SSC ee degaankaas ku sugnaa.
Xaalada degaanka ayaa hadda yara degan inkastoo xiisado iyo dhaqdhaqaaqyo ciidan laga dareemayo. Somaliland weli kama hadlin dagaalkan hase ahaatee maamulka SSC ayaa war ka soo saaray kaasoo u qornaa sidatan hoose.
𝐖𝐀𝐑-𝐌𝐔𝐑𝐓𝐈𝐘𝐄𝐄𝐃 𝐋𝐀𝐀𝐒𝐂𝐀𝐀𝐍𝐎𝐎𝐃 𝟎𝟏, 𝐍𝐎𝐕𝐄𝐌𝐁𝐄𝐑, 𝟐𝟎𝟐𝟒
Saaka waaberigii hore, ciidamada jabhadda Somaliland ayaa weerar gaadmo ah ku soo qaaday ciidamada difaaca Daraawiishta ee ku sugan deegaanka Shangeed. Ciidamada SSC-Khaatumo, oo u taagan ilaalinta karaamada iyo nabadgelyada deegaankooda, ayaa si xooggan u difaacay dhulkooda, iyagoo cadawga ka hor taagan duullaankooda ay doonayaan inay ku xasuuqaan shacabka SSC Khatumo.
Weerarkii ay soo qaaday jabhadda SNM waxaa looga hortagay si geesinimo leh, iyadoo ciidamada Daraawiishta ay ku guuleysteen inay ka baacsadaan cadowga duleedka tuulada Qorilugud. Waxaana SSC-Khaatumo ka go’an inay sii wadaan difaaca dhulkooda, iyagoo aan cidna uga baahan taageero, balse u dagaalamaya karaamada iyo sharafta dadkooda.
SSC-Khaatumo waxay caddeysay marar badan in aysan oggolaan doonin in deegaankooda uu noqdo meel lagu bar tilmaameedsado shacabka, gaar ahaan xoolo dhaqatada ku hawlan noloshooda. Ciidamada SSC-Khaatumo waxay sii wadi doonaan difaaca iyo ilaalinta deegaankooda iyagoo ka jawaabaya talaabo kasta oo gardarro ah oo kaga timaadda dhinaca jabhaddaha isbahaystay ee Somaliland. SSC-Khaatumo waa bulsho aan jabeyn, oo diyaar u ah inay si joogto ah uga hortagto duullaanka gardarrada ah, waxayna ku adkeysanayaan in sharafta iyo karaamada deegaankooda aysan noqon doonin mid lagu xad gudbo.
𝐃𝐇𝐀𝐌𝐌𝐀𝐀𝐃
