Ciidanka milatariga dowladda Turkiga , ayaa weeraro aargoosi ah oo looga jawaab celinayo weerarkii shalay ka dhacay magaalada Ankara ka fuliyay xeryo ay leeyihiin kooxda Kurdiyiinta , kuwaa oo kuyaalla deegaanno dhaca dalalka Ciraaq iyo Suuriya.
Wasaaradda Difaaca Turkiga ayaa sheegtay, in duqeymo cirka ah oo ay diyaaradaha dagaalka Turkiga ka fuliyeen bartilmaameedyo ku yaalla waqooyiga Ciraaq iyo Waqooyiga Suuriya ay ku burburiyeen, ilaa 32 bartilmaameed oo ay leeyihiin PKK.
Warka kasoo baxay Wasaaradda Difaaca dowladda Turkiga ayaa sidoo kale lagu sheegay in ay duqeymaha ay ciidankooda fuliyeen lagu dilay laguna dhaawacay tiro badan ka mid ah dagaalyahannada ururka PKK, balse ma aysan xaqiijin tirada saxda ah.
Wasiirka Arrimaha Gudaha dowladda Turkiga ayaa weerarkii shalay ka dhacay magaalada Ankara ee caasimadda dalka Turkiga ku eedeeyay kooxda mamnuuca ka ah Turkiga ee PKK, oo ah koox u dagaalanta xorriyadda Kurdiyiinta Turkiga.
Weerarkii shalay ka dhacay Ankara ayaa lagu dilay 5 qof , halka lagu dhaawacay 22 qof oo kale, kaddib marki laba nin oo hubeysnaa ay weerareen xarunta dhexe ee Warshadda Diyaaradaha iyo Dayax-gacmeedyada Cirka ee Turkiga ee magaalada Ankara.
Xafiiska Shabakada Allbanaadir.com
Muqdisho Somalia
Allbanaadir@live.com
