Fiidnimadii Caawa, maleeshiyada Al-Shabaab ayaa weerar gaadmo ah ka fulisay guriga Salmaan Mooge Cabdi, oo hore uga tirsanaa shaqaalaha Wasaaradda Howlaha Guud ee Dowladda Federaalka Soomaaliya.
Nasiib wanaag, Salmaan ayaa ka maqnaa guriga xilligaas, taas oo ka badbaadisay weerarka qorsheysan.
Shaqaalaha dowladda iyo kuwa la shaqeeya hay’adaha dawladda ayaa marar badan bartilmaameed u noqda Al-Shabaab, oo adeegsata weerarrada si ay ugu cabsi geliso bulshada iyo cadaadis ugu saarto dawladda.
Dhacdadan argagaxa leh waxay kusoo beegmaysaa saddex maalmood kadib markii Al-Shabaab ay weerar gaadmo ah ku dishay Ikran Maxamed Cabdi, halka ay afduubteen Cabdifataax Cali Xassan, oo labaduba ka tirsanaa shaqaalaha hore ee Wasaaradda Howlaha Guud.
Xaaladda goobta weerarku ka dhacay ayaa weli kacsan, iyadoo cabsi xooggan ay soo wajahday dadka deegaanka.
Shacabka ku nool xaafadda ayaa welwel xoogan ka muujinaya ammaankooda iyo mustaqbalka ubadkooda, maadaama weeraradan naxdinta leh ay sabab u noqdeen xaalad deganaansho la’aan ah.
Al-Shabaab ayaa horey u bartilmaameedsatay shaqaalaha dowladda si ay u muujiyaan awooddooda iyo inay ku cabsi geliyaan dadka ka shaqeeya dawladda. Kooxda ayaa wajahaysa nacayb sii kordhaya oo kaga imanaya bulshada, taas oo ku khasbeysa inay sii kordhiyaan falalka argagixisada si ay u xaqiijiyaan saameyntooda magaalada.
