Madaxweynaha dowlad goboleedka Jubbaland Axmed Maxamed Islaam (Madoobe) , ayaa maalmo kahor isaga baxay shirka Golaha Wadatashiga Qaran ee ka socday Muqdisho, kaddib markii uu qaadacay qodobada qaar ee shirkaasi kasoo baxay.
Wararka aan heleyno ayaa sheegaya in Villa Soomaaliya wado dedaalo dib loogu soo celinayo magaalada Muqdisho Madaxweynaha Jubbaland Axmed Madoobe , si uu mar kale qeyb uga noqdo shirka Golaha Wadatashiga Qaran oon wali lasoo gunaanadin.
Ra’isul Wasaaraha Soomaaliya Xamse Cabdi Barre oo isku heyb yihiin Axmed Madoobe booskana keensaday , ayaa ku guul dareestay in uu Axmed Madoobe ku qanciyo in uusan shirka ka bixin, sidoo kale ogolaado go’aannada madaxda Federaalka iyo kuwa maamulada kale gaareen.
Axmed Madoobe ayaa hadda la saaray cadaadis lagu qasbayo in uu kusoo laabto magaalada Muqdisho qeybna ka noqdo shirka Golaha Wadatashiga, waxaana Axmed Madoobe loo diray siyaasiyiin, odayaal, iyo ganacsato ku heyb ah si ay cadaadis u saaraan.
Villa Soomaaliya ayaana ka wel welsan diidmada Madaxweynaha Jubbaland muddo kordhin mar kale loo sameeyo madaxda dowlad goboleedyada, taa ay u aragto Villa Soomaaliya mid uu ku hirgali karo damaceeda ku aadan muddo kororsi iyo in dalka ka qabsoonto doorasho qof iyo cod ah.
Madaxweynaha Jubbaland haddii uu ku adkeesto go’aankiisa uuna diido in uu kusoo laabto magaalada Muqsdsho, waxaa fashil kusoo dhammaan doono qorshihii Villa Soomaaliya ee muddo kororsiga, waxaana lagu qasbanaan doonaa in doorashooyin laga qabto dowlad goboleedyada.
Xafiiska Shabakada Allbanaadir.com
Muqdisho Somalia
Allbanaadir@live.com
