Danjire Axmed Macallin Fiqi, Wasiirka Arrimaha Dibadda iyo Iskaashiga Caalamiga ah ee Jamhuuriyadda Federaalka Soomaaliya, ayaa cambaareeyay soo gelinta dalka ee hub sharci-darro ah oo ka yimid Itoobiya
Waxaa uu ku tilmaamay talaabadaas khatar weyn oo ku wajahan amniga qaranka.
Wasiirku wuxuu sheegay in dowladda Federaalka ay tallaabooyin adag qaadeyso si looga hortago hubka Itoobiya soo gelineyso dalka loona ilaaliyo madaxbannaanida Soomaaliya. Waxa uu ugu baaqay Itoobiya inay ixtiraamto heshiisyada caalamiga ah oo ay joojiso ficillada khalkhalka gelin kara gobolka.
Sidoo kale, Wasiirku wuxuu uga mahadceliyay Turkiga kaalinta ay ka qaadanayaan fududeynta wada-hadallada u dhexeeya Soomaaliya iyo Itoobiya, isagoo cadeeyay in wada-hadalladu aysan guuldareysan, inkastoo hoggaanka Itoobiya ay ka cagajiidayaan ka qayb gal buuxa.
Wasiirku wuxuu xaqiijiyay in Soomaaliya ay ka go’an tahay wadahadalka, iyadoo Turkigu door muhiim ah ka qaadanayaan dhexdhexaadinta nabadda gobolka. Sidoo kale, Wasiirku wuxuu ka hadlay muhiimadda ah in la hagaajiyo adeegyada fiisaha ee muwaadiniinta Soomaaliyeed ee u socdaala Hindiya, gaar ahaan kuwa waxbarashada, daryeelka caafimaadka, iyo ganacsiga, isagoo soo jeediyay in qunsuliyad laga furo Muqdisho.
Danjire Fiqi wuxuu ka qayb galay shirar heer sare ah inta lagu guda jiray Kulanka 79-aad ee Golaha Guud ee Qaramada Midoobay, oo ay ka mid ahaayeen kulanka Wasiirrada Dhaqdhaqaaqa Aan Isbahaysiga Laheyn (NAM), halkaasoo uu mar kale ku xaqiijiyay taageerada Soomaaliya ee Falastiin iyo ka hadalka ficillada Itoobiya.
Sidoo kale, wuxuu la yeeshay kulammo laba geesood ah mas’uuliyiin ka socda Qubrus, Masar, iyo Venezuela, isagoo diiradda saaray amniga, ganacsiga, iyo horumarinta dhaqaalaha. Dhinaca amniga, Wasiirku wuxuu wada-hadallo kala yeeshay INTERPOL iyo Qaramada Midoobay oo ku saabsan maamulka dowladaha gobolka iyo dembiyada caalamiga ah ee ka baxsan xuduudaha.
