Macawiisleyda Beesha Jijeelle ayaa ilaa shalay ku hortaagan Degmada Qurac-joome ee Gobolka Bakool Gaadiid xamuul ah oo loo malaynayo inay hub sidaan isla markaana ay deegaanada Koonfur-galbeed u galbinayeen Ciidamo Itoobiyaan ah.
Macawiisleyda Jijeelle ayaa isku dayey inay baaraan gaadiidka balse Ciidanka Itoobiya ayaa ka biyo diidsan, waxaana jirta xiisad ka dhalatay arrintan oo ka taagan degmada Qurac-joome.
Gaadiidkan oo ilaa lix ka kooban isla markaana ay galbinayaan Ciidanka Itoobiya ayaa ku sii jeeday Gobolka Bay, sida wararku nagu soo gaarayaan.
Itoobiya ayaa mudooyinkan gaadiid hub sida soo gelinaysa Soomaaliya siyaabo kala duwan, hasa ahaatee tilaabada ay ku hor istaageen Macawiisleeyda Jijeelle gaadiidkan ayaa ah mid ugub ah, lamana oga talaabada ay qaadi doonaan ciidanka Itoobiya si ay gaadiidkan u gaarsiiyaan Baydhabo.
