Waxaa maanta Magaalada barakeysan ee Maka dalka Sacuudiga ku geeriyooday Ugaaska beesha Murusade ALLAHA u naxariistee Marxuum Ugaas Cabdullaahi Ugaas Xaashi Ugaas Faracadde.
Ugaaska ayaa mudooyinkan la tacaalayey cudurka Kansarka oo uu ildarnaa, isagoo daweyn u tagay qaar ka mid ah dalalka Yurub iyo Carabta sida ay sheegeen qaar ka mid ah eheladiisa oo warbaahinta u xaqiijiyey geeridiisa.
Ugaas Cabdullaahi waxa uu ka mid ahaa tiirarka dhaqanka Soomaaliyeed, isagoo kaalin weyn ka soo qaatay mideynta nabadeynta iyo horumarinta dhaqanka guud ahaan beelaha Soomaaliyeed.
Waxa uu sidoo kale kaalin mug leh ka soo qaatay xili adag marxaladihii kala duwanaa ee uu soo maray hanaanka dowlad dhiska Soomaaliyeed.
Bahda Allbanaadir Online waxay iyagoo ka tiiraanyeysan tacsi u dirayaan qoyska ehelada iyo shacabka Soomaaliyeed ee uu ka baxay Ugaas C/llaahi, iyagoo ALLE uga baryaya inuu janadii fardowsa aheyd ka waraabiyo qoyska iyo shacabka Soomaaliyeedna samir iyo iimaan ka siiyo AAMIIN.
