Dowlad goboleedka Puntland, ayaa si adag u beenisay eedeyn uga timid Hay’adda Qaramada Midoobey u qaabilsan taageeridda carruurta ee UNICEF, taa oo ku eedeesay in Puntland dhawaan xukun dil ah ku fulisay afar dhallinyaro ah oo aan qaangaarin.
Wasiirka Warfaafinta ee Puntland Maxamuud Caydiid Dirir, ayaa waxba kama jiraan ku tilmaamay eedeynta ka timid UNICEF, waxa uuna sheegay in dhammaan dadkii dhawaan xukunka dilka ah lagu fuliyay ay ahaayeen dad waa weyn oo qaangaar ah.
Waxa uu sheegay Wasiirka Warfaafinta Puntland in dadkan xukunka dilka ah lagu fuliyay ay xabsiga ku jireen muddo dheer , waxa uuna xusay in dhammaan dadkaasi la hubiyay in ay ahaayeen dad qaangaar ah , sidoo kale qirteen fal dambiyeedyada lagu soo eedeeyay.
“Xaqiiqda waxaa weeyaan Puntland dad carruur ah ma toogan, dadkaas la toogtay intooda badan saddex sano in ka badan ayay xabsiga ku jireen, “Muuqaalkooda waad arkeyseen qof 30 jir ka yar kuma jirin da’dooda iyo dhalashadoodana waa la xaqiijiyay inay dad waawayn oo qaan-gaadh ah yihiin fal dambiyeedkoodana ay qirteen oo cidina ku qasbin” ayuu yiri Wasiir Dirir.
Wasiirka Warfaafinta Puntland ayaa sidoo kale sheegay in raggan xukunka dilka ah lagu fuliyay la horgeeyay hay’adaha caddaaladda ayna mareen habraacii saxda ahaa, waxa uuna sheegay in muddo dheer raggan xirnaayeen ayna ka qaateen racfaan xukunno horey loogu riday.
“Qiraalkooda iyo baaritaankooda ayaa isla caddeeyay inay dinuubtaas galeen racfaana loo ogolaaday muddo saddex sana ah oo waliba mar labad iyo mar saddexaad dib loo maxkamadeeyay si baaritaanka intii uga sii xaqiiqo bato haddi ay helaan wax xujooyiin ah oo ay isku difaaco helaanloo ogaalay oo fursad la siiyay,” ayuu yiri Wasiirak Warfafainta Puntland.
Fagaare kuyaalla waqooyiga magaalada Gaalkacyo ayaa 17-kii bishan lagu toogtay toban nin oo lagu helay in ay katirsanaayeen kooxda Al Shabaab , kuwaa oo sidoo kale lagu eedeeyay in ay dilal u geesteen waxgarad, saraakiil iyo dad kale oo haldoor ahaa oo kunoolaa waqooyiga Gaalkacyo.
Xafiiska Shabakada Allbanaadir.com
Muqdisho Somalia
Allbanaadir@live.com
